K a jingwanrah jong ka Sorkar ïa ka ain ban pyrkhing ïa ka jingshna iing kaba la tip kum ka Meghalaya Building Bye Law ka long tang ha ki jaka sor bad la pynjlan sa sha ki khap sor. Hynrei ha ka jingtyllun ka shalyntem ki por, la i donkam ban pynjlan ïa kane ka aiñ namarba ki District Headquarter mynta ki la nang mih ki ing mala kiba heh. Ki paidbah kiba shong basah sha ki District bapher bapher ka jylla kim dei ban sngew khohñïoh lada ka Sorkar ka pyntreikam ïa kane ka aiñ wat sha ki shnong ba kyndong ka jylla namarba ki dei ban sngewthuh bha ba ka Jylla Meghalaya ka dei ka lynti ïaid jong u jumai kaba hap ha ka Seismic Zone-V bad ka jingkhynñiuh u jumai ka ju jia khah khah.
Ha u snem 1897 ka Jylla Meghalaya ka la mad ïa ka jingjulor kaba khraw bha hadien ka jingkhie u jumai uba jur 8.7 magnitude. Shwa kane, u jumai uba jur 8.5 magnitude u la jia ruh ha u snem 1950 ha kaba ka la wanrah ïa ka jingduh ei ki mynsiem briew bad ka jingjulor ki ing ki sem.
Watla shipah snem tam mynshwa ka jingkhynñiuh u jumai ka jingjulor bad ka jingïap lehse ka lah ban duna hynrei ki paidbah ki la dei ban pyrkhat bha da ki hajar sien bad ban puson bha ba la donkam ïa ka aiñ kaba pyrkhing ban shna iing bun mala namarba ka jingbun briew ha kane ka jylla ka la nang kharoi.
Ka jingtyrwa jong ki Autonomous District Council ïa ka tnat District Council Affairs (DCA) jong ka Sorkar Jylla ban pynjlan ïa ka ain shna ing sha ki nongkyndong ka jylla ka long ba ki la ïohi ïa ka jingmih jong ki ing mala ha kaba ki paidbah ki la sdang ban shna ïa ki iing ki sem kiba kham bha bad lehse ha ka jingïohi jong ki Autonomous District Council la i dei ban don da ka ain kaba lah ban tehlakam ïa ka jingshna iing mala.
Da ka jingshimkhia jong u Symbud Myntri Rangbah ka Jylla uba khmih ïa ka tnat District Council Affairs u Bah Prestone Tynsong u la lum ïa ka jingïalang jong ki Autonomous District Council ban ïathir ïatai bad ban pyrkhat sani bha halor ki jingeh kiba lah ban ktah ïa ka jylla ha ki shnong bapher bapher jong ki 12 tylli ki district ka jylla.
Haoid, ki jaka kiba hap hapoh ka Municipal ka Meghalaya Urban Development Authority (MUDA) ka tehlakam ïa ka jingshna iing bun mala hynrei ka jingbym pat pyntreikam ïa ka Building Bye Laws sha ki nongkyndong ka Jylla ka dei kawei pat kaba pynpyrkhat ïa ka District Council ban pyntreikam noh da kane khnang ban ïada lypa ïa kino kino ki jingjia kaba la ban wanrah ïa ka jingduhei ki mynsiem bakordor lada jia ba wan ki bor lynshop jong ka mariang ha ka por ka bym poi pyrkhat.
Mynta ka shong sa ha ka Komiti kaba la thaw da ka District Council Affairs kumno ban pyrkhat ïa kane ka jingai jingmut jong ki Autonomous District Council (ADC) ban pyntreikam ïa ka Meghalaya Building Bye Laws sha ki shnong nongkyndong jong ka Jylla la ka sngewdei neem ban pdiang ïa kane ka jingai jingmut bad ka shong ruh sa ha ki paidbah ban phah ïa ki jingai jingmut sha ka Sorkar Jylla ban pynjanai ïa kane ka aiñ khnang ba kane ka aiñ kan ym ktah pat ïa ki paidbah nongkyndong kiba dang duna ka ïoh ka kot watla khyndiat eh ki dei kiba bit ba biang ha ka ïoh ka kot.
Lada ka Building Bye Laws ka la treikam sha ki nongkyndong kam dei ban ktah pat ïa ka ïoh ka kot jong ki paidbah nongkyndong namarba ka jingpyrshah jong ki paidbah ha ki snem ba la leit noh ban pyntreikam ïa kane ka aiñ ba pyrkhing da ka MUDA ha kito ki por ka dei namarba ki sngewthuh ba kin hap ban siew da ka dor kaba rem hynrei hadien ba ka Sorkar Jylla ka la aiti sha ka Autonomous District Council ban pyntreikam tang ha ki Scheduled Area kiba bun ki Dorbar Shnong ki la pdiang sngewbha ïa kane ka aiñ.
