ïa ki ïew Khappung lah ban plie tang lada ïa mynjur lang ka sorkar India bad Bangladesh

Shillong, Jylliew 7 : U MLA ka UDP na Mawsynram u bah Olan Sing Suin u la ong ka jylla Meghalaya ka la long kaba kloi ban plie ïa ki ïew Khappud tang lada ïa mynjur lang da ka sorkar India bad Bangladesh.
Haba kren sha ki lad pathai khubor halor ka jingkhang ïa ki Iew Khappud, u bah Suin u la ong baroh arliang ki ri ki dei ban ïa mynjur lang ban plie biang ïa ki iew khappud. “ Na ka liang ka Meghalaya ka la long kaba kloi ban plie ïa ki ïew Khappud ha kano kano ka por tangba ka shong eh ha ka ri Bangladesh namar baroh shi katta ka la ïai kyntait bad kam kwah ban plie ïa ki ïew Khappud. Na baroh arliang ka sorkar jylla bad ka sorkar Bangladesh ki dei ban ïasngewthuh jingmut lang da ka jingai bor jongka sorkar India ban plie biang ïa kine ki ïew khappud. Lait nangta tang ka jingai bor ka India ruh ka Meghalaya kam lahban plie ïa ki ïew khappud kaba kongsan eh ka dei ka jingmynjur jongka Bangladesh”.
“ Ka Mawsynram ruh ka don ha ki bynta khappud bad ka Bangladesh bad ka don ar tylli ki ïew Khappud, ha ka por ba kine ki ïew Khappud ki dang plie wat ki nongkhaïi ba rit ba ria bad wat kin ongkhaïi ba heh ruh ki ïoh kamai jakpoh bha na kine ki ïew. Ki die ïa ki mar ki mata na India ha ki ïew Khappud bad ki thied pat ïa ki mar ki mata jongka ri Bangladesh ban die pat hangne hapoh ka jylla. Na kata ka daw ki ïoh kamai pisa bha ban kyrshan ïa ka ïing ka sem ka jongki bad wat ka jylla ruh ka ïoh lum bun ka khajna na kine ki ïew khappud” ong u bah Suin.
U la ïathuh ba u la ïakren bad ka sorkar jylla ba kan shim khia ban bud dien ïa kane ka kam na ka sorkar pdeng.
U la ïathuh wat u Myntri Rangbah ka jylla u la bud dien ïa kane ka kam hynrei na ka liang ka Bangladesh ka sngap jar jar bad shu kyrmen ïa kaba bha tam khnang ba ki paid khappud kin ïoh ban kamai jakpoh ne kine ki ïew khappud.