Shillong, Nohprah 30 : Satang shi sngi ba u snem 2022 un leit jynduh noh nangi bad ba ngin sa pdiang ïa u snem uba thymmai 2023, kum ki nongïalehkai na ki jait jingïalehkai bapher bapher jong ka Jylla Meghalaya kim lah ban klet ïa u snem 2022 bad undei ruh u snem uban pynsah jingkynmaw shi rta la ka long ha jingkiew jinghiar jong ka jingïalehkai bad kiwei kiwei kiba kum ki nongïalehkai ki la ïoh ban mad bad ïakynduh ha ka jingïaid lynti jong ki.
Haba phaidien ïa ka jinglong jingman jong ka jingïalehkai hapoh ka jylla hapoh ka shi snem, ka jingïalehkai ka la kiew bha ha kaba ki khun samla, ki hep kiba rit ki la ïoh ban pynpaw pyrthei ïa la ki jong ki sap ba ki don la ka long ha ka jingïalehkai hapoh la ka jong ka jylla, shabar na la ka jong ka jylla bad wat shaduh ki ri jong ka pyrthei.
Ym lah ban len ruh ba hapdeng katei ka jingïaid lynti, ki nongïalehkai ki la mad ka jingeh la ka long ha ka liang ki jaka ïalehkai, ka bai leit bai wan ha ka jingleit ïashim bynta ha ki lympung bapher bapher shabar na la ka jong ka jylla. Hynrei kaba kham pyndiaw mynsiem ïa ki nongïalehkai kadei ha ka jingpynlong ïa ka Meghalaya Games 2022 ha kaba na ka liang ka Meghalaya State Olympic Association (MSOA) kam shym la lah ban pynbiang ïa ki jingdonkam jong ki nongïalehkai.
Ki nongïalehkai kiba la wan na kylleng ki District jong ka jylla ki la hap ban sahmiet ha ki kamra kiba jaboh ha JN Stadium, ka jingbym biang ki jaka leit shabar kum ka paiñkhana ka bam ka dih nalor kiwei kiwei. Hadien kane ki la mih shibun ki jingshah kynthoh ïa ka MSOA bad kumjuh ruh ïa ka tnad sport jong ka sorkar jylla, hynrei na ka liang u Myntri Rangbah dalade u la hiar ban leit jngoh ïa ki jaka sah ki nongïalehkai bad u la lap dalade ïa ka jingshisha bad khlem da pynslem u la pynkynriah noh ïa kito ki nongïalehkai kiba sah ha katei ka jaka sha ki hotel.
Ki nongïalehkai kim lah ruh ban klet ïa kaei kaba ka sorkar ka la leh bha na ka bynta jong ki ha kaba ka sorkar MDA hapoh ka jingïalam u Myntri Rangbah u Conrad K Sangma ryngkat ka Directorate of Sports And Youth Affairs ka la pyllait ïa ka bai bam (scolarship) bad pynkup burom na ka bynta kito ki nongïalehkai kiba wanrah takma na ki jingïalehkai bapher bapher.
Ki nongïalehkai bad ki paidbah ka jylla kim lah ruh ban klet khamtam ka jingpynlong ïa ka 2nd North East Olympic Games 2022 ha u Naiwieng ha kaba katei ka lympung ka la long kaba jop da ka jingkyrshan lang da baroh ki paidbah nongshong shnong. Ka Meghalaya kaba dei ka trai jaka, ka la pyni shisha sha ka pyrthei ba ka la kiew stet ha katei ka lympung namar na ka kyrdan kaba hynriew kaba ka don ha u snem 2018 mynta pat ka la kiew sha ka kyrdan kaba saw da ki 36 tylli ki takma ksiar kaba long haduh 12 shah na kaba ki ïoh ha u snem 2018.
Ka Meghalaya ka la ïoh ruh ban khur haduh 35 tylli ki takma rupa bad 78 tylli ki takma rnong. Na ka liang ka sorkar Jylla katba lah ka la pynbit pynbiang ka jingdonkam jong ki nongïalehkai ka jylla. Ka la ïaid shaphrang ruh mynta u snem ban tei ïa ki jaka ïalehkai kynthup naduh ka jingshna pynbha ïa ka JN Stadium kaba don ha Polo, ka PA Sangma Stadium ha Tura bad ki madan ïalehkai ha ki shnong nong-kyndong.
Kyrmen skhem ba ha u 2023 kumba ka Sorkar ka buh ka thong ban pyndep ïa kitei ki jingtei ba kin dep ha ka por kaba biang khnang ba kan long ka jingmyntoi na ka bynta ki nongïalehkai kiba don ka sap ha ki jingïalehkai.
