Pynkup burom ka Kur Syiemlieh ïa u samla Donbestar u ‘rangïakura ha ka 1st Guwahati MMA C’ship

Mawkyrwat, Nohprah 30 : Kum ka dak jong ka jingaimynsiem ïa u samla Donbestar Syiemlieh uwei na ki ‘rangïakura uba la wanrah nam wanrah burom ïa ka Kur ka jait ka Shnong ka thaw, na ka liang ka Kur Syiemlieh jong ka shnong Diwah Shadmoit, ha ka 26 tarik u Nohprah, 2022 ka la ïoh ban leh burom da kaba ka la leit pdiang ïa u na shiteng lynti najan shnong Umjaraiñ ka lad ban kiew sha shnong Diwah Shadmoit, South West Khasi Hills District.
Lah ban kdew ba u samla Donbestar Syiemlieh na ka shnong Diwah Shadmoit, South West Khasi Hills District u dei uwei na ki nongïakura uba la jop bad ïoh pdiang ïa ka khusnam nongïakura bat bit ne ‘Best Fighter’ ha ka 1st Guwahati MMA Championship ba ka pynïaid da ka Legacy Combat MMA & Fitness Gym ba la kyrshan pisa na ka United Assam Mixed Martial Arts Association (UAMMAA).
Ha kane ka sngi jingleh burom ha ïing jong u samla Donbestar Syiemlieh la ïadonlang naduh u bah Carness Sohshang, MDC jong ka Mawkyrwat Constituency, u bah Steveford Marweiñ, MCS, Extra Assistant Commissioner, South West Khasi Hills District, u Kñi Rangbah jong ka Kur Syiemlieh uba bat ruh ïa ka kam Secretary jong ka Kur, u bah Roland Syiemlieh ha kaba kine ki la ai ruh ïa ki jingkren ai mynsiem ïa u samla Donbestar Syiemlieh ba um dei ban kut tang ha kane ka bynta ban ïoh ithuh kum u nongïakura uba tbit ha kane ka sien ba mynta hynrei u dei ban don ka thong ban poi de sha kiwei pat ki kyrdan kiba kham hajrong ban ïoh ruh ïa kata ka syrnod kum u “Professional License”, namar kumba la ïathuh ba une u samla Donbestar un dang hap ban ïa khun sa kumba 20 tylli ei ei ki jingïakhun ban ïoh ïa kata ka jingithuh.
Kumta kum u nongïakura um dei ban shongthait hynrei u dei ban nang trei shitom nangne shakhmat bad long ruh u briew uba phikir ïa la ka jong ka jingim bad kiar na kiba bun ki jait jingsniew kiba long la daw jong ka jingpyntroiñ ne pynduh bor noh tang shiteng por. “Kum u samla u dei ruh ban kiar na ka jingshongkha khynnah, kiar na ka bam ka dih kum ka kyiad bad kiwei de ki jingdih hynrei u dei ban minot thop ha kane kam kham ba kan long ka jingmyntoi ha ka lawei ka ban sa wan”, ki la ai mynsiem.
Ha kajuh ka por ki la kyntu bad kyrpad ruh ba kum ki khun samla jong kane ka ïing ka sem ki dei ban long ma ki ki nuksa ba bha ïa kiwei dei ki para kur khnang ba ka lawei jong ki samla kan long kaba phyrnai lyngba ki kam ba bha ha ka imlang ka sahlang bad ka ri ka jaidbynriew. “Ka jingtrei shitom hi ka long ka daw jong ka jingwanrah ïa u soh jong ka jingjop ha kiba bun ki jingïaleh”, ong u bah Steveford Marweiñ, MCS, Extra Assistant Commissioner, South West Khasi Hills District.
U bah Cores Marweiñ, u nonghikai jong ka Mixed Martial Arts (MMA) ha ka jingkren jong u u la ïathuh ïa ki katto katne ki bynta jong ka jingsdang jong kane ka Mixed Martial Arts (MMA) ha kaba ha ka pyrthei baroh kawei la sdang ha u snem 1993 ha United State of America (USA) kaba la ai kyrteng ka Ultimate Fight Championship (UFC) bad ha ka Ri India pat la sdang ha ki snem 1998 shaneng. Ula ïathuh ruh ba kane ka Mixed Martial Arts (MMA) ka dei kawei na ki jait jingïalehkai kaba long ïa tyngkhuh baroh shimet bad ka dei ruh ka jingïalehkai kaba kham eh haba ïa nujor bad kiwei de ki kam ïalehkai bad ha kajuh ka por ka long kaba kham eh bha ban ïoh ïa ka jingithuh kum kita ki nongïakura ba tbit ne ïoh ïa ka ‘Professional License’ lymda ymdon ka jingtrei shitom jong u ne ka nongïakura.
Namarkata, u la ong ruh ba lada u samla Donbestar Syiemlieh u kwah ban ïoh ïa kata ka ‘Professional License’ u la hap ban don ka jingïaleh sa kumba 20 tylli ki jingïakura. Kumta u la ai mynsiem ïa u samla Donbestar bad kiwei de ki samla jong ka dong ka thaiñ ba haba ki jied ïa ka kam ne wat ha ka kam ïalehkai ki dei ban jied da kaba don ‘Professional’ bad buh ruh ïa ka thong bad lada ki bakla ban jied kin shu kut noh tang ha shiteng lynti.
U samla Donbestar Syiemlieh haba kren ha u nongthoh khubor, u la ïathuh ba ïa kane ka kam ïa kura u la sdang naduh u snem 2019 ha Shillong bad hadien kata lyngba ka jingaimynsiem na kiba ha ïing ha sem u la leit ban bteng ïa kane ka kam ïa kura ha kawei na ki shlem shah hikai ha Ri Bhoi hapoh ka jingïalam jong u bah u bah Cores Marweiñ, Coach jong ka Mixed Martial Arts (MMA) jong u snem 2021 bad haduh mynta u dang bteng ïa kane ka kam.
“Ka daw ba ka sa pynlong ïa nga ban rung ha kane ka kam ïa kura ne ka Mixed Martial Arts (MMA) ka long ba nga don jingthrang naduh dang rit ïa kaba nga ju i tynnad ban peit ïa ki phlim ia kura kum ka phlim Scott Adkins bad Bruce Lee”, ong u samla Donbestar.
U la ong ruh ba ka thong jong u ban rung ha kane ka MMA kam dei tang ba un kiew tang ïa lade shimet hynrei u kwah ruh ba ynda u la shongthait na kane ka kam ïa kura ynsa buh de ïa kawei na shlem ai jinghikai hapoh ka South West Khasi Hills District.
La pynshit pynshngaiñ ïa kane ka sngi da ka jingshad na ki hep kiba rit bad kumjuh na ki samla jong ka Kur Syiemlieh.
Ha kajuh ka sngi la ïoh ruh ka jingkren ai mynsiem na u Kñi Rangbah jong ka Kur Syiemlieh uba bat ruh ïa ka kam Secretary, u bah Roland Syiemlieh ha kaba la pynïaid ïa ka jingïalang da u bah Crosstarwel Syiemlieh bad ka jingkren khublei na u samla Jespar Syiemlieh.