SHILLONG, Jylliew 23: Ha ka sien ba nyngkong ka Meghalaya Football Association [MFA] ka la rai ban pynlong ïa ka lympung ïalehkai kaba la tip da ka Meghalaya State Youth League na bynta ki khynnah shynrang kiba hap hapoh 14 bad 16 snem (Under 14 & 16).
Na ka liang jong ki nongïalam ka MFA ki la ïoh ban pynlong ïa ka jingïalanng da kaba lumlang ïa ki President bad Secretary jong ki District Sports Association bapher bapher hynnin ka Sngi Saitjaiñ (22 tarik) ha Conference Room jong ka SSA Stadium khnang ba kin sngewthuh shai bha ha kano ka rukom ban kumno ban pynlong ïa kane ka lympung Youth League.
Lyngba kane ka jingïalang ka MFA ka la ïoh ban pyndep ban bynta ïa ki kynhun ki ban mihkhmat na man la ki District Sports Association ha saw tylli ki Zone, ba kynthup ïa ka East Khasi Hills, West Khasi Hills, Jaintia Hills Zone bad ka Garo Hills.
Haba ïakren sha ki lad pathai khubor, u Bah Suresh Syiem-Secretary jong ka MFA, u la ïathuh ba namar ba ha kane ka kynti ïa ka Youth League yn pynïalehkai hala ïing bad shabar (Home & Away), te na ka liang jong ka synjuk ka la btah ïa ki DSA ba ki dei ban jied ïa ka madan kaba bha tam ban pynlong ïa ki jingïalehkai hala ïing (Home Ground) namar ka long ka jingmyntoi ïa ki khynnah ban pynpaw pyrthei ïa ka sap kaba ki don.
“Mynta ka sngi Ngi la ïoh ban pynshai ïa ki kyndon sha ki kynhun kiba ka synjuk ka la buh bad baroh ki la ïahun, bad kaba dang sah mynta ka long ban sdang ïa kane ka Meghalaya Youth League, kumba Ngi la buh ha ka 20 tarik Naitung,” la ong u Bah Suresh.
Ha kaba ïadei bad ka rukom bynta kynhun, u Bah Suresh u la ïathuh ba man la ki Zone ki don la ki jong ki kynhun, bad 20 tylli ki kynhun ki ban ïakhun.
Ka East Khasi Hills ka don san tylli ki kynhun ba kynthup ïa ka Shillong Sports Association, Sohra Sports Association, Riwar Mihngi Football Association, bad ar tylli ki kynhun na Ri-Bhoi, ka Ri-Bhoi District Sports Association bad ka Western Ri-Bhoi Sports Association.
Ka West Khasi Hills la pynïakap hynriew tylli ki kynhun: Nongstoin Sports Association, Mawkyrwat District Sports Association, Pyndengumïong District Sports Association, Mawshynrut Sports Association, Tyrsad Area Sports Association bad ka Easter Border Sports Association.
Ka Jaintia Hills ka don san tylli ki kynhun: West Jaintia Sports Association, East Jaintia District Football Association, Laskein Block Sports Association, Amlarem Block Sports Association bad ka Saipung Area Sports Association.
Ka Garo Hills ka kynthup ïa saw tylli ki kynhun: District Football Association Tura, Williamnagar District Sports Association, District Sports Association-North Garo Hills bad ka Baghmara District Football Association.
