Ha ki phew snem mynshwa, lada kwah ban ïoh pule doktor, engineer, dei ban long u ne ka samla ba pule ïa ki sobjek Mathematics bad Science bad lada ka jingïoh marks ki samla pule ka kiew sha ka 60 lane 70 percent, ha ka eksamin Pre University, kumta ki la ïoh na ka bhah jong ka sorkar jylla ban leit pule sha kitei ki kyrdan haneng.
Ha kine ki khyndiat snem, ka sorkar India, ka la knieh jubor noh ïa katei ka bynta bad ka kam jong ki sorkar jylla bad ka la pynlong da kata ka NEET ha kaba baroh ki samla pule kiba pass bha ne kiba pass thohmut thohmat, ki lah ban ïakhun ïa katei ka eksamin, ba kin ïoh ban leit pule doktor kaba ym lah satia ban mutdur.
Hynrei mynta u snem katei ka eksamin, kaba la pynlong, da kawei ka kompeni, kaba la tip kyrteng National Testing Agency (NTA), ka la thadrong thadburom ïa ki samla, kiba ïakhun ïa katei ka eksamin, da kaba la kynnoh ba ka la pyllait tuh ïa ki jingkylli, nangta ka la pynmih haduh 67 ngut kiba wan ha ka kyrdan kaba nyngkong bad nangta, ka la ïarap ai marks tam ïa ki 1,563 ngut ïa kitei ki samla ïaleh doktor.
La ïohi ruh ba ka eksamin hi baroh kawei, ka la pynmih ïa ka jingkhie bitar jong ki samla pule doktor, ha kylleng ka Ri India bad ba la hap ban leit mudui sha Supreme Court, ïa katei ka jingjyrwit jyrwat jong katei ka eksamin.
Katei ka jingjia, kumta ka la thad burom ïa ki samla pule bad ka la pynkhuslai mynsiem ïa kiba bun, nangta ka la pynduh jingkyrmen ruh ïa ki 24 lak ngut antad, kiba shim bynta ha katei ka eksamin bad katei kam shym la ktah satia, tang ïa ka burom ka ijot jong ki samla pule, hynrei ka la long ka jingduh kaba khraw ïa ki kmie ki kpa ruh kumjuh, kiba la hap ban pynlut ïa ka spah ka phew jongki, na ka bynta ba ki khun jongki, kin poi sha ka thong.
Ka eksamin ka la pulom bad la sngewthuh ba ki thmu ban pynlong biang, hynrei ka jingleh thamula jong ka NTA, ka la pynduh noh ïa ka bok ka rngiew bad ka jingkut jingmut jong ki samla kiba thrang ïa katei ka laiñ.
Kam dei tang katta, hynrei kane ka eksamin, ka la knieh noh ïa ka hok jong ki sorkar jylla, nangta ka la knieh noh ïa ka hok jong ki samla kiba wan na ki nongkyndong bad kiba duk ki bym ïoh lad ban leit sha ki jaka pynkhreh kot, ha shwa ban ïaleh ïa kitei ki eksamin bad kumta kiba duk, kin sa shah khanglad, katba kiba riewspah, kin ïoh ban leit shah pyntbit ha ki coaching centre kiba bha tam.
Nalor ba ka sorkar India, ka la knieh noh ïa ka hok jong ki sorkar jylla bad nangta kam lah ruh ban pynïaid beit, ha kaba ha Jowai ruh dangshen, ka eksamin ka la jakri jakra, kynrum kynram bad katei ka rukom pynïaid, kan sa khanglad ïa ki trai shnong na Meghalaya, ba kin ïakhun ïa kitei ki eksamin bad ba kin ïoh ban pule doktor bad kumta kin sa wan poi da ki poiwir poihap suda sha ki shnong ki thaw ban trei ha ki hospital bapher bapher bad ka sorkar jylla ka dei ban wad noh ïa la ka jong ka Medical College bad ban pynsangeh noh ïa katei ka NEET, namarba ka dei ka jingthombor ïa ka hok jong ki sorkar jylla.
Haduh mynta ki samla kylleng ka Ri India ki la ïakhih halor kane ka eksam NEET bad ki la dawa ba dei ban wengnoh ïa ka jingaiti sha ka NTA ba kan pynlong ïa kane ka eksamin namarba kam pat kot bor eiei ban pynïaid namar la bun sa tang ki kam thur mur suda bad ki jingbym ïaid beit ïaid ryntih.
