Sngewhun ki nongïalam jong ki DSA ba shimkhia ka MFA ban pynlong ïa ka Youth League

SHILLONG, Jylliew 23: Ki nongïalam jong ki District Sports Association bapher bapher, ki la pynpaw ïa ka sngewkmen ba ka Meghalaya Football Association ka la shimkhia ban kyntiew ïa ka sap ïalehkai jong ki khynnah ka jylla da kaba pynlong ïa ka Meghalaya Youth League na bynta ki khynnah shynrang hapoh 14 bad 16 snem.
Haba ïakren bad ki lad pathai khubor, na ka liang jong ki katto katne ngut ki nongïalam ki DSA, ki la pynpaw ïa ka jingsngew kmen da kaba kdew ba kane ka dei ka kabu ksiar ïa ki ba kin sei ïa ki khynnah lehkai kiba don ïa ka sap ha ka phutbol bad kiba angnud ban kiew shaphrang ha ka phutbol.
Shuh shuh, ki la ïathuh ba kane ka long ka kabu ka ban pynsngew sha ka sorkar ban phaikhmat bad noh jingïarap sha ki synjuk ha ki District ban ïoh ïa ki madan kiba kham bha khnang ba kan long ka jingmyntoi ym ïa ka synjuk hynrei ïa ki khynnah kiba thrang bad kiba don shisha ïa ka sap ban ïalehkai phutbol.
Kane ka lympung kan sdang ha ka 20 tarik, Naitung.