2 sngi slap khlem sangeh, shlei um ha Jorabat-Khanapara, twa khyndew bun jaka ha Ri-Bhoi
Kyrpad ki Pulit ïa ki paidbah ban long kiba phikir
Nongpoh, Jymmang, 30: Ka jingther u slap ba khlem sangeh naduh hynnin ka sngi ka la pynlong ïa bun jaka ha Ri-Bhoi District ban mad ïa ka jingshlei um, twa khyndew bad ka jingkyllon jong ki dieng ki siej bad katkum ka jingtip ba la ïohlum tad haduh ba thoh ïa kane ka khubor, ym don satia ba mynsaw ne jingjia ba sngewsih.
Kawei na ki shnong ba shah ktah jur eh ha kane ka jingshlei um ha Ri-Bhoi District, ka dei ka shnong Umpher kaba ju mad ïa ka jingshlei um man ka por, hynrei mynta ka kynti ka jingshlei um ka la kham shyrkhei, ha kaba bun ki longiing ki la shah ktah bad shah tap haka um kaba la rung sha ki iing ki sem bad khamtam ka skul St Jude Secondary School, Umpher kaba la ju mad ïa ka jingshlei um, man ka por ka mala ba shapoh bad ka phyllaw jong katei ka skul ka la dap da ka um kaba la kylla kum ka jhad kaba per ha um bad kum ki bor pynïaid skul kim lah shuh wat ban pynlong skul.
Kane ka jinghap slap ba khlem sangeh ka la pynlong ruh ïa ka surok bah National Highway haka thaiñ 12 mer, Jorabat, 9 mer ban kylla kum ka wah bah bad pynlong ruh ïa kiba bun ki kali ban sahkut bad don ruh ki kali kiba la per kaba la wanrah ruh ka jingdheng kali kaba jur bad na ka liang ki bor pulit ka Ri-Bhoi ki la trei shitom katba lah ban pynïaid ïa ki kali ha katei ka thaiñ bad weng ïa ka jingdheng kali
Shuh shuh nalor ka jingshlei um ha kiba bun ki jaka haka them Ri-Bhoi ba la ktah shikatdei ïa ki paidbah bad ki iing ki sem, la ïoh jingtip ruh ba ka la don ruh ka jingtwa khyndew hajan khyrdop jong ka NEPA ha lad Umsaw bad kumjuh haka shnong Nongspung B bad na ka liang ki pulit bad bor district ki la ïaleh katba lah ban weng ïa ka khyndew ba hap ha surok ban pynlait ïa ka leit ka wan ki paidbah.
Na ka liang ki bor pulit ka Ri-Bhoi ki la kyrpad ruh sha ki paidbah ba leit ban wan ban long kiba phikir na ka jingjur u slap ban kiar ruh na kaba mih shabar khlem da donkam bad ban pyntip mar mar haba don kano kano ka jingtwa khyndew, shlei um bad kiwei kiwei ki jingjia.