Shillong, Naiwieng, 30: Ka Jylla Meghalaya ka la kynjoh sha uwei pat u mawmer ha ka jingpyntyllun ïa ki kam pynroi ha ki kam jngohkai pyrthei da kaba ïoh pdiang T.199 klur lyngba ka “Special Assistance to States for Capital Investment – Development of Iconic Tourist Centres to Global Scale” scheme ka skhim kaba dei na ka Ministry for Tourism and Infrastructure (MFTI) na ka bynta u snem 2024-25. Kane ka pisa ba la mang sha ka Jylla Meghalaya ka long shi bynta na ka T. 3,295.76 klur ba la mang sha ki 23 tylli ki jylla ha kylleng ka ri India hapoh kane ka skhim kaba thmu ban shna ïa ki jingtei ba itynnat bad ban kyntiew ïa ka ïoh ka kot.
Kane ka jingkyrshan pisa kan ïarap ïa ki ar tylli ki projek ba la tyrwa da ka tnad Jngohkai Pyrthei, ka jingshna pynitynnat ha pung Umïam bad ka jingtei ïa ka jaka jngohkai pyrthei ha ka shnong Mawkhanu, ïa kaba la mang pisa mar T. 99.27 klur.
Ka Meghalaya ka long kawei napdeng ki san tylli ki jylla ban ïoh pdiang ïa ki song jingïarap ba hakhmat eh kaba kot T. 198.5 klur. Khamtam eh, ka Meghalaya ka la tam ïa kiwei pat ki jylla ha ka thaiñ Shatei Lammihngi bad kiba bun ki jylla kiba kham heh ha ka ri, ha kaba ym don kawei ruh kaba ïoh pisa palat ïa ka T. 100 klur lait noh ka jylla Assam.
Ka tnad Jngohkai Pyrthei jong ka Meghalaya, katkum ka por ba la buh pyrkhing bha ka la aiti ïa ki jingtyrwa projek kiba bniah kiba ïahap bad ki nongrim ba ïadei bad ka jingpynneh pynsah bad ki thong ban kyntiew ïa ka jngohkai pyrthei kiba shong nongrim, ban kyntiew ïa ka ïoh ka kot ha ka thaiñ, ban pynkha ïa ki lad ïohkam ïohjam.
Ka jingtei pynitynnat ïa ka pung Umïam: Ka pung Umïam, ka spah jong ka kolshor bad ka mariang jong ka Meghalaya ryngkat bad ki jaka ba itynnad, kan long ka jaka jngohkai pyrthei kaba pawnam. Ka projek ka kynthup ïa ka shnong shna tiar da ki kti, ka jaka pyni ïa ki kam shna dur bad pyni kolshor, ka kper thung jingthung, ka jaka ïalehkai thiatar, bad ki jingtei kiba donkam kum ki surok bad ki jingdonkam. Kane ka jingpynbha thymmai kan long ruh kum ka jingpynrung ïa ka surok Western BypassHighway kaba thmu ban pynduna ïa ka jingkhapngiah ha Shillong bad Sohra.
Ka pung Umïam kaba khring haduh 16,222 ngut ki nongjngohkai pyrthei manla u snem la ka antad ba kan khring haduh 1,27,750 lak ngut ki nongjngohkai pyrthei manla u snem hadien ka jingpynitynnat. La khmih lynti ba kane ka projek kan pynmih 1,168 tylli ki lad ïohkam bad 2,675 tylli kiwei pat ki jait kam ban kyntiew ïa ka ïoh ka kot lyngba ki kam jngohkai pyrthei bad ban kyntiew ïa ka jingim jong ki nongshong shnong lyngba ka public-private partnerships (PPP). Kiwei pat ki ban kham khring shuh shuh ka long na ki jingdon jong ki Luxury Resort, Glamping Sites bad ki jaka ba la shna pynwandur bha ki ban wanrah ïa ka jingitynnad jong ka pungUmïam na ka bynta ki nongïaid kai bad bad ki nongleit jingleit.
Ka jingshna ïa ka jaka bakongsan ha Mawkhanu: Ka projek ha ka shnong Mawkhanu la thmu ban shna na ka bynta ki kam ba ïadei bad ka kolshor bad ki kam imlang sahlang. Ki jingtyrwa ban shna ki kynthup ïa ka Meghalayan Experience Theme Park, ka madan pynlong tamasa bad ka Amphitheater bad kiwei kiwei ki jait jingbyrngia. Ha kane ka jaka yn sa pynlong ïa ki tamasa kum ka Cherry Blossom Festival, ka jingïatem ïaput bad kiwei kiwei.
Da ka jingthmu ban tei ïa kine ki jaka bakongsan ha ka shnong Mawkhanu yn khring ïa ki nongjngohkai pyrthei na Shillong ban pynkiew da 2.5 lak manla u snem bad ban pynmih 1,016 tylli ki kam bad 2,327 tylli kiwei pat ki jait kam. Ki projek PPP ha ki por ban sa wan kum ka Amusement Park, ka Convention Centre, ka Luxury Accomodation bad Golf Gourse kin sa long ki jingtei ban kyntiew ïa ka ïoh ka kot.
U Myntri Rangbah ka Jylla u Conrad K. Sangma u la pynpaw ka jingsngewsarong halor ka jingkynjoh jong ka Jylla ïa ka thong. Ka jingïoh ïa ka mang tyngka kan pynlong ïa ka jylla Meghalaya ban ïaryngkat kyrdan bad kiwei pat ki jaka jngohkai pyrthei kiba khring ïa ki briew.
“Kine ki projek ym tangba ki pynroi ïa ka ïoh ka kot jong ngi hynrei kin ïada bad pynneh pynsah ïa ka kolshor bad ki sawdong sawkun na ka bynta ki pateng ki ban sa wan,” la ong u Myntri Rangbah.
“Kum kawei na ki nongïoh pdiang ba hakhmat eh ïa kane ka skhim, ka Meghalaya kan ïai buh thong ban kyntiew ïa ki kam jngohkai pyrthei ha India, ban ïalam lynti ïa ka thaiñ Shatei Lammihngi da ka jingthmu kaba pynkhlaiñ ïa ka ïoh ka kot, ka jingïatreilang ha ka imlang ka sahlang bad ka jingkyntiew ïa ka kamai kajih,” u la bynap.
