Shillong, Naiwieng, 09: Ka tnat Pule Puthi jong ka Sorkar Jylla ha ka sngi Balang ka la pynbna ba ka la pyllait ïa ka baibam (Scholarship) na ka bynta ka Pre Matric bad ka Post Matric jong u snem 2021-2022 ban siew sha ki samla pule jong ka jylla.
U Myntri ka tnat Pule Puthi ka Sorkar Jylla u Bah Lahkmen Rymbui ha ka rynsan Twitter u la pyntip ba la pyllait ïa ka pisa kaba T. 169, 72, 91. 678 klur sha ki 61,116 hajar ngut ki samla pule ka jylla.
Ïa kane ka pisa yn sa siew sha ki Account jong ki samla pule lyngba ka PFMS.
Ha ka jingiakren bad ki lad pathai khubor u Bah Rymbui u la ïathuh ba kane ka pisa ka dei kaba la bei 90 percent na ka Sorkar Pdeng bad 10 percent na ka Sorkar Jylla.
Lah ban kdew hangne, dang ha kine ki khyndiat sngi ka Hynñiewtrep Youths Council (HYC) bad ka Meghalaya Trinamool Congress Student’s Union (MTCSU) ki la dawa ïa ka Sorkar ba kan pyllait noh mardor ïa ka baibam jong ki samla pule ka jylla khnang ba kin ïoh pyndap ha kaba siew ïa ka bai pule bad ban pyndonkam ha kiwei kiwei de ki jingdonkam.
Ki nongïalam jong ka Education Cell ka Hynñiewtrep Youth Council (HYC) ki la leit ban ïakynduh ïa u Myntri ka tnat Pule Puthi ban pan jingpynshai ha kaba ïadei bad ka jingpynslem jong ka Sorkar ban siew ïa ka baibam na ka bynta u snem 2021-2022.
Shwa kane, u Chairman jong ka Education Cell ka HYC u Samla Enlang Sawian ha ka jingïakren bad ki lad pathai khubor ha ka sngi Balang u la pynbna ba ka seng ryngkat bad ki samla pule jong ki Kolej bapher bapher ka jylla kin pynlong da ka jingïaid paidbah na madan Ïewrynghep, Laitumkhrah sha Parking Lot kaba don markhap bad ka ophis Additional Secretariat.
U la ong ruh ba ka seng bad ki samla pule jong ki Kolej bapher bapher kin pynlong beit ïa ka jingïakhih katba kim pat ïohi ïa ka jingthoh (Official Notification).
U la ïathuh ba ka Seng ka ladep pan jingbit na ka ophis jong ka Deputy Commissioner ban pynlong ïa ka jingïaid paidbah hynrei ka seng kam shym la ïoh jingbit satia. “Watla katta ruh na ka liang ka seng ryngkat bad ki samla pule kan ïaid shakhamat ïa kane ka jingïakhih,” u la bynrap.
Katkum ka tyllong khubor ba la ïohlum la ïathuh ba ka KSU NEHU Unit ka la byrngem ban pynthut ïa ka jingplie ïa ka North East Olympic Games-2022 ha madan jong ka SAI, NEHU Shillong namar ka jingpynslem jong ka Sorkar ban pyllait ïa ka scholarship.
Ha ka jingïakren bad u President jong ka North Eastern Hills University Student Union (NEHUSU) u samla Mesan Dkhar u la ong ba ka Union ka dang ap ïa ka Official Notification ha kaba ïadei bad kane ka jingpyllait ïa ka Scholarship.
“Kaei kaba u Bah Lahkmen u kren ka dei tang bad ki nongthoh khubor bad lyngba ka Twitter jong u. Katba ngim pat ïohi ïa ka Saction Letter ngim lah ban shu ngeit bad lada dang pynslem ban pynlait ïa ka scholarship lada donkam ban pynkhih ïa ki samla pule jong ki 75 tylli ki kolej ba pynïasoh bad ka NEHU ruh ngin sa leh,” u la ong.
U Chairman jong ka Green Tech Foundation, Meghalaya u Bah H. Bansiewdor Nonglang u la kynthoh da kaba ong, “ka jingkylli kaba mih mynta ka long hato donkam mo ba ki samla pule kin byrngem ïakhih ba kin ïoh ïa kaei kaba dei hok ka jong ki.”
“Kane ka jingpyllait ïa ka pisa shi sngi shuwa ban pynlong ïa ka jingïakhih ka pyni ba ka Sorkar Jylla ka ladep ïoh pdiang ïa ka song pisa ban siew ïa ka Scholarship na ka Sorkar Pdeng na ka bynta u snem 2021-22 bad hato kane ka jingpynslem ka lah ban dei pynban ba ki thmu ban pyndonkam sha kiwei pat ki bynta namarba u snem 2023 ruh u la jan,” la kynnoh u Bah Nonglang.
