Shillong, Naiwieng 09 : Ka kynhun Myntri ha ka sngi Balang kala mynjur ïa ka Ordinance na ka bynta ban pyndam noh ïa ka aiñ khalai kaba la tip kum Meghalaya Regulation of Gaming Act (MRGA), 2021.
Haba kren bad ki lad pathai khubor hadien ka jingialang jong ka kynhun Myntri, u Myntri Rangbah ka Jylla, Conrad K Sangma u la ong, “Kumba la pynbna da u Myntri ka tnad Taxation, la wanrah ïa ka Ordinance bad ka Kynhun Myntri ka la ai ïa ka jingmynjur ban pyndam noh ïa katei ka Gambling Act.”
Halor ka jingkylli lano ka sorkar kan pynskhem ïa ka Ordinance, u Myntri Rangbah u la ong ba kam pat kano kano ka jingïa kren la kan don neem ka jingshong Dorbar.
“Kumba ka long hi, ïa kino kino ki ordinance ba la mynjur dei ban rah sha Iing Dorbar haba don ka Dorbar. Kumta ha ka sien shong Dorbar kaban wan da kaba ïa syllok bad u Lamphang ngin sa lah ban pynbeit lano kan long,” u la bynrap biang.
Lah ban kdew hangne ba ka rai jong ka sorkar jylla ban pyndam noh ïa katei ka aiñ kadei hadien ba ka la don ka jingpyrshah kaba jur na ki liang bapher bapher khamtam eh na ki kynhun balang bad ruh na ki seng bapher bapher.
