Shillong, Naiwieng, 09: Ka Khun Hynñiewtrep National Awakening Movement (KHNAM) ka la buh jingkylli ïa ka Sorkar Meghalaya Democratic Alliance (MDA) hadien ba u Myntri Rangbah ka Jylla Assam u Himata Biswa Sarma u la pynbna dang shen ban ïatreilang bad ka Sorkar Meghalaya na ka bynta ban pynkylla ïa ka pung Umïam kum ka jaka jngohkai pyrthei ba ïaryngkat kyrdan bad kiwei pat ki jaka jngohkai ha ka pyrthei.
“Ka khubor ba la saphriang ha ki Social Media, ha kaba u Myntri Rangbah ka Assam u Himanta Biswa u la ong ba yn pynkylla ïa ka pung Umïam sha ka jaka jngohkai kaba ïa ryngkat kyrdan bad kiwei pat ki jaka jngoh kai ha ka pyrthei baroh kawei da ka jingïatreilang jong ka Sorkar Assam bad Meghalaya ka la pynlyngoh ïa ka seng, namarba na ka liang jong ka Sorkar Meghalaya kam pat don kano kano ka jingpynsngew halor kane,” ong u Chief Publicity Secretary ka KHNAM-Central Executive Committee u Bah James MA Neng.
“Ka jingkylli kaba mih ka long da ka bor jongno u Himanta u la pynbna ïa kane ka khubor, ngim wit ïa ka jingwan ki kam pynroi, hynrei kam mut pat ba ngin shu hun tang ka roi ka par ïoh shisien ka sngi ngi duh pat ïa ka hok long trai. Hato kane ruh ka dei kawei na ki kam ba sopsop jong ka Sorkar MDA bad ka Ssorkar Assam?” la buh jingkylli ka KHNAM.
“Lada kane ka long ka jingshisha, ka mut ba ka Sorkar MDA ka la leh sopsop ïa kane ka kam na ka bynta ka jingmyntoi jongno re jongno bad ka wan ruh ka jingkylli mano ba dei u Myntri Rangbah ka Jylla Meghalaya u Conrad Sangma ne u Himanta Biswa,” la bynrap ka KHNAM.
“Ka Umïam ka hap hapoh upud usam jong ka Meghalaya bad kane ka jingpynbna khubor jong u Myntri Rangbah ka Assam ka kdew tang ar tylli ki lynti, kawei ba ka Sorkar Assam ka la nud ban tuklar ym tang ha khappud, hynrei wat ha ki jaka pdeng jong ka jylla khlem ka jingïoh jingbit na ka Sorkar Meghalaya bad kaba ar ka paw ba ka sorkar MDA ka la pynbeit ïa kane ka kam sopsop bad ka Sorkar Assam khlem ka jingtip jong u paidbah,” la ong shuh shuh u kyrwoh na ka KHNAM.
Khlem da pyntip paidbah ïa ki kyndon jingaiteh hapdeng kine ki ar tylli ki jylla bad khlem ka jingïashai paidbah ka long kaba bakla. Ka Umïam kam dei ka pung jong u Myntri Rangbah ban un leh katba mon lane ban leit lilam kat shaba u kwah. Ka seng ka pynrem jur bad ka dawa ïa ka jingpynshai ba bniah na ka Sorkar MDA, la ong u kyrwoh.
