Shillong, Nailur 18: Ka ïing Bishar Shillong sessions court ka la ai jamin 14 sngi ïa u General Secretary ka KSU u samla Reuben Najiar namar ka jingkhlad noh u kpa jongu.
U samla Reuben uba don ha ka jingshah set phatok , ha kaba ïadei bad ki mukotduma kiba mih na ka jingkulmar haka por pynlong ïaid paidbah da ki arshaka da ka KSU, ha ka 19 tarik Naiwtung.
La ai jamin ïa u samla Reuben haka 17 tarik Nailur bad la bthah ïa u, ba un pyndem noh ha ka 1 tarik Risaw.
Lah ban kdew ba u samla Reuben u la shah kem ha ryngkat bad u president ka KSU u samla Raymond Kharjana bad u vice president u samla Pynkmenlang Sanmiet hadien ba la pynlong ïa ka jingïaid rally arshaka ha ryngkat lama ïong ha ka 19 tarik u Naitung.
Ki pulit ki la register case hadien ki jingjia shah kawang maw, shoh briew bad pynjot ïa ki mar mata, thang kali, pynpait ïit kali, haka por pynlong ïa ka rally arshaka.
ïa kane ka jingïaid rally arshaka ka KSU la ai jingbit da ki bor district jong ka East Khasi Hills ha ryngkat ka jingbuh kyndon ba ym dei ban thaw jingkulmar bad ka dei ban ïaid da kaba jai jai.
Katba ka jingtohkit ka nang ïaid, la ïalam ïa ki nongïalam ba la shah kem ha khmat ka ïing Bishar ha ki katto katne ki khep bad la pynngat kyndon shuh shuh ïa ki ha kaba ïadei bad ki mukotduma ba la register ha Sadar, Mawlai bad Rynjah police station.
Hadien kane la kem sa ïa 3 ngut ki nongïalam ka KSU kata u Jeremaiah Pohthmi, u Samuel Kharbani bad u Banjop Dkhar bad baroh ki nongïalam ka KSU kiba la shah kem ha kaba ïa dei bad kitei ki case ka la kot sha ka 6 ngut.
Ka jingshah kem kaba dang shen ka dei ïa u president ka KSU Shillong East Circle da ka kynhun tohkit SIT najan NEIGRIHMS ha ka 11 tarik u Nailur bad la ïalam ïa u hakhmat ka ïing Bishar ha ka sngi kaba bud.
Ka jingpyllait jamin shipor ïa u samla Reuben Najiar ka long ban ailad ïa u ban leit sha la ïing namar ka jingkhlad noh jong u kpa khnang ban ïa don ryngkat bad ka ïing ka sem ha ka jingpyndep ïa ka jinglehniam leh rukom bad leit ontep don burom ïa u.
