Shillong, Nailur 18 : Ka All Primary School Teachers Association (APSTA) ka la pynkut noh ïa ka jingrakhe TJMCC 2026 ha ka 16tarik mynta u bnai kaba long ruh ka sngi lyngkhuh snem ba 177, ka jingkhlad noh jong U Sahep (L) Thomas Jones I, bad ruh ka lyngkhuh snem ba 184 ka jingsdang jong ki Lower Primary skul ha kine ki Lum Khasi bad Jaintia.
Ka jingrakhe ka long ha ki ar bynta. Ha ka step jong ka 16.09.2026, ka APSTA ka la plie ïa ka Charity Home ba la aiti sha i Kong Smierda Kharsati, ha ka shnong Mawber. Ïa ka iing la plie bad aiti da u Babu Tonyfort War, President ka APSTA bad u Bah Banteidor Lyngdoh MLA ka Mawkynrew Constituency. Ïa ka iing la tei ha ka jinglut kaba Hynriew Lak tyngka ïa kaba la bei da ki nonghikai ka APSTA.
Ka bynta kaba ar ka long ha ka por 1.00 PM ha Krissimai Mini Stadium, Smit la pdiang sngewbha ïa baroh da u President ka Seng.
Ki nongkren kiba la kren ha kane ka jammiet ki long u General Secretary uba la pynshai lut kaei kaba ka Association bad ki bor pynïaid khamtam ha kaba ïadei bad ka Centralization Pension Scheme, ka Rationalization ïa ki skul; ka order SPF ba dang shu pynmih shen.
U la kren ruh shaphang ka jingïadei bad ka jingpynkhreh ïa ka Rally ha ka 07.10.2026, ban pyrshah ïa ka SPF. U la ai khublei ruh ïa ki symbud kongsan kiba la pyllait por ban ïa don ryngkat. Ka jingkhublei ba u General Secretary u ai ka long ïa ki nonghikai APSTA khamtam ïa ki nonghikai ha ka batch 2010-2011, kiba la wan ban pynïasoh bad ka APSTA.
La ïoh ruh ïa ka jingkren na u Rangbah Banteidor MLA,uba la kular ban don ryngkat bad ki jingdawa jong ka APSTA.
Ka kyrwoh ka ong ruh, “Na ka liang u Kongsan, Bah Ardent u la ban khia ïa ka jingdonkam ban kyntiew bad rah ïa ka burom ïa ka pule puthi kaba la hiar sha ki kyrdan kiba la pynlehrain ïa ka Ri bad jaibtynriew. U ai burom ruh ïa ka APSTA kaba la lah ban shakri bad pynkynmaw man la ka snem ïa kane ka sngi ba kyrpang ban kynmaw ieit ïa U (L) Rev.Thomas Jones.U la kitbok ruh ïa ka APSTA ban nang ïaid shaphrang.”
La ïoh ruh ban sam ïa ki jingnoh sngewbha sha ki nonghikai 12 ngut na ka Smit Unit kiba la shongthait na ka kam.
Shuh shuh ka kyrwoh ka ong, “Kaba kham shoh bad sngew lung mynsiem ka long ka jingnoh synniang sha ki 19 ngut ki nonghikai batch 2010-2021, kiba la duh noh ïa ka kam ha ka snem 2021, na ki daw ba ki bor ka tnad Education kim niewkor bad burom ïa ki. Ka jingnoh synñiang ka long Shi Lak Arphew Wei Hajar man la iwei i nonghikai na ki 19 ngut, kaba ka jinglut ka long haduh Arphew Lai lak.”
‘Ym dei ruh ban klet ïa kiba la ïa don bynta ha kane ka sngi, naduh ki nongwai ka Smit Unit, ka Mawkynrew Unit, ki khynnah skul ka St.Peter Smit. bad kiwei kiwei kiba ym lah ban jer kyrteng hangne bad kumjuh ka jingkren pynwai na u Babu Readingstar Warlarpih Secretary ka Smit Unit APSTA,” ong ka kyrwoh ba la phah da u Babu Francis Lapang, Publicity Secretary ka APSTA.
