Shillong, Nailur 11: Ka Nongkseh ka la pyni ïa ka jingkhlaiñbor jong ka da kaba pynjemkhnap haduh 7-1 kol ïa ka Meghalaya Police ha ka jingïakhun jong ka Shillong Premier League hynne ka sngi Thohdieng ha SSA Stadium.
U Hardy Cliff Nongbri (5’, 12’, 55’, 87’) u la sei madan ïa ka jingïalehkai kaba kyrpang kum u kapten da kaba thep saw tylli ki kol – kaba dei ruh ka hat-trick kaba nyngkong jong ka SPL 2026. Kane ka dei ruh ka jingjop kaba bun kol tam ha kane ka samoi.
Tang kumba katto katne minit ha ka kylla step u Hardy u la ïoh ban pynkhihjar ar sien katba ka Nongskeh ka la pynskhem ïa ka jingsynshar jong ka ïa ka jingïalehkai naduh kaba sdang. U Kitboklang Pale (42’) u la bynrap ïa kaba lai ha ki minit ba khatduh jong ka kylla step bad ka Nongkseh ka la jam sha ka por shongthait da kaba lamkhmat 3-0.
Kam shym la don kano kano ka dak jong jingkyrmen ban wanphai na ka bynta ka MLP ha ka kylla miet, ha kaba u Hardy, u Shano Tariang (61’) bad u Aenam Jyrwa (65’) ki la nang pynjlan shuh shuh ïa ka kol lamkhmat ban pynthikna ïa ka jingjop khlem jingartatien.
Watla kata ruh, ka MLP ka la ïohlad ban pynphai shi kol lyngba u Bisharlang Kharumnuid (78’) shuwa ba u Hardy un thep ïa ka kol kaba saw jong u bad kaba hynñiew jong ka kynhun.
Ka sien ba khatduh ba kine ki arliang mamla ki la ïakynduh ha ka lympung phutbol jong ka Shillong Sports Association ka dei ha ka jingïakhun phainal jong ka First Division 2025. Ka Nongkseh ka la jop ïa kane ka jingïakhun da 1-0 ban rah ïa ka trophy. Kum ka lahduh bad kaba wan baar, ka Nongkseh bad ka MLP ki la kiew kyrdan sha ka SPL mynta u snem.
Watla ka Nongkseh ka la jam shakhmat na ka First Division ban jop ruh ïa ka SSA Champions Cup bad ka Meghalaya State League, hynrei ka la mad ïa ka jingtynjuh kaba kham jwat ha ka SPL 2026. Shuwa kane ka jingïakhun, ka Nongkseh ka shong ha ka kyrdan kaba phra ha ka miej da kaba kamai tang 4 poiñ, katba ka MLP ka don ha ka kyrdan kaba saw da kaba kamai 7 poiñ. Ka Nongkseh ka la ïohlad ban thep tang 2 kol ha ki saw tylli ki jingïalehkai, ka jingkheiñ kaba duna tam napdeng ki kynhun.
Da kane ka jingjop, ka Nongkseh ka la kyntiew ïalade ha ka miej kheiñ poiñ. Mynta, ka Nongkseh, ka MLP bad ka Nangkiew Irat baroh ki ïaryngkat mar 7 poiñ hadien san tylli ki jingïakhun. Da kaba pynshong nongrim ha ka jingïapher kol (goal difference), ka Nongkseh (+5) mynta ka don ha ka kyrdan kaba saw, ka Nangkiew Irat (-1) ka sah ha ka kyrdan kaba san katba ka MLP (-5) ka hiar ar kyrdan sha ka kyrdan kaba hynriew.
Mynta ka sngi ka Shillong Lajong kan aireng pyrshah ïa ka Sawmer ha ka por 3 baje nohphai sngi.