Shillong, Ïaiong 13 : Ka HSPDP ka la kam ba ki arngut ki MLA jong ka, kiba donlang mynta ha ka sorkar synrop MDA 2.0 ba kin ym mih satia na ka party ban leit ïasoh noh bad ka National People’s Party kaba ïalam mynta ïa ka sorkar.
Haba kyntait ïa ka jingmih ki khubor hamsaïa halor kane, u President ka party, Bah KP Pangniang u la ong, “Kam dei satia ba ki leit pynïasoh sha ka NPP hynrei kadei ka jingleit treilang bad ka sorkar MDA kaba ïalam da ka NPP.”
Ki arngut ki MLA ka HSPDP ki kynthup ïa u Bah Shakliar Warjri MLA ka Mawthadraishan ba dei ruh u Myntri ka tnad Sports bad kumjuh ruh u MLA ka Mawshyntur, Bah Methodius Dkhar.
Katei ka jingkren jong u, ka mih ruh hadien ba la phriang kylleng ki khubor ba arngut ki MLA jong ka PDF kin sa leit ban pynïasoh noh shen sha ka NPP.
“Mar ïa thaw ïa ka sorkar MDA 2.0, ki la mih ki jingkylli la kitei ki MLA ki la pynïasoh sha ka NPP. Kam dei satia ba ki leit ban pynïasoh sha ka party hynrei kadei tang ka jingleit ban ïa treilang bad ka sorkar ba ïalam da ka NPP,” u la pynshai shuh shuh.
Shuh shuh u la pynshai ruh ba ka jingthmu jong ka party ban leit treilang bad ka sorkar ka long ban pynurlong ïa ki mat ba ka party ka buh na ka bynta ka bit ka biang jong ki paidbah.
