Shillong, Ïaiong 13 : Ka BJP ha Meghalaya ha ka sngi Palei ka la ong ba ki shaniah ha ka jingstad jong ka sorkar ban pynbeit ïa ki ishu ba ïadei bad ka jingpyntreikam ïa ka roster system.
“Ngi shaniah ha ka jingstad jong ka sorkar jylla ban shim ïa ka rai halor kane ka bynta ha ka jingïalang jong ka kynhun Myntri kaban sa long shen,” ong u President ka BJP Meghalaya, u Ernest Mawrie haba kren bad ki lad pathai khubor.
Nalorkata, u ong ruh ba mynta ki dang ap ïa ka jingïalang jong baroh ki seng saiñpyrthei kaban khot da u Myntri Rangbah ban ïakren halor ka roster system.
Da kaba kam ba ka BJP ka kham noh bad ka reservation policy jong ka jylla kaba la pyntreikam naduh ba ka Meghalaya ka ïoh la ka jong ka jylla, u Bah Mawrie u la ong ruh ba ka nongrim jong ka party ka long ba baroh lai, kata ki Khasi, Jaiñtia bad Garo kin ïoh lang ïa ka bhah kaba khlem noh shilliang.
Shuh shuh u ong ruh ba ka party kan sa pynshai shuh shuh halor katei ka ishu tad ynda la dep shong ka jingïalang jong baroh ki sengsaiñpyrthei.
Lah ban kdew hangne ba ka Iingbishar ka la aiti ha ka sorkar bad ïingdorbar banrai halor ka Roster.
