Ka jingpyntreikam ïa ka Roster naduh u 1972 ka ïatyngkhuh bad ka Reservation Policy: HYC

Shillong, Ïaïong 13: Ka Hynñiewtrep Youth Council (HYC) ha ka sngi Balang ka la leit ban aiti ïa ka dorkhas sha ka chief Secretary ka jylla u Bah DP Wahlang ban dawa ba ka sorkar jylla kan pynbeit biang ïa kiba bun ki jingdkoh bad ki sohkyrdot ha ka jingpyntreikam ïa ka Roster System na bynta ka jingthung kam ha ki tnat ba pher ba pher jong ka sorkar jylla lyngba ka Reservation Policy.
Haba kren sha ki lad pathai khubor hadien ba u la dep ban ïakynduh bad Chief Secretary, u President ka HYC u Bah Robert June Kharjahrin u la ong ba ka jingdawa ka HYC ban pynbeit biang ïa ka Office Memorandum (OM) jong ka Roster System namar ka don ka jingïatyngkhuh bad ki kyndon jong ka Reservation Policy.
“Ngi la ai jingmut ïa ka sorkar ba kan pynbeit thymmai ïa ka OM halor ka Roster System namar ha ki kyndon jong ka la kdew shai ba ka jingpyntreikam ïa ka Roster kan dei naduh u snem ba la mynjur ba ka Reservation Policy kaba mut naduh u 1972 bad kan treikam ha ka jingthungkam ha ki tnat sorkar bad lada ngi peit pat ïa kat kum ka Resolution jong ka Reservation Policy kaba la mynjur ha u 1972 la ong ba ïa kino kino ki post ba dei bhah kawei napdeng ki kynhun jaidbynriew lada dei ba kim lah ban pyndap na ka jingduna kiba aplai ne kino kino ki daw la kdew ba ïa kata ka bhah jong ki yn rah sha u snem uba bud ban kheiñlang lang nalor ka 40% ba la bhah lupa ha ka jingthungkam,” u la ong.
“Ka Policy ka kdew ruh ba lada kiwei napdeng kine ki kynhun jaidbynriew kam lah ban pyndap tang marsiteng na ka 40% ïa kane ka bhah jong ki yn pynjlan haduh lai snem bad lada kim lah ban pyndap ha u snem uba lai ka bhah na kito ki snem ba kim lah pyndap kat kut noh (lapse) bad ha ka OM ïa ka Roster pat la bthah ban thungkam biang da kaba pynshong nongrim naduh u 1972 bad kane ka don ka jingïatyngkhuh bad ka Reservation policy kumba ngi la kdew,” u la bynrap.
U la ong ba kat kum ka jingkam ka sorkar ba ka don ka jingbthah ka High Court ban pyntreikam ïa ka Roster System naduh u 1972 ha ka PIL ba la ujor da ka Zenera R Marak hynrei ha ka hukum ba ka pynmih haba shong bishar ïa ka PIL ba la ujor da u Greneth M Sangma ka kdew ba ka shong ha ka sorkar bad ka ïingdorbar thawaiñ ban buh ïa ka snem ot kyrteng ne cutoff date na bynta ka jimngpyntreikam ïa ka Roster.
“Ngi mynjur ba ka don ka jingbymshai ki hukum ka High Court bad ngi sngew banong ba lada ka don ka jingbym shai ïa kitei ki hukum ka High Court ka sorkar ka dei ban shim nuska na ka rai bishar ka Supreme Court (SC) haba ka pynmih ïa ka hukum haba shim bishar ïa ka mokotduma RK Sabharwal Ors vs state of Punjab&Ors haba pynkhreh ïa ka Roster System namar ha ka rai bishar ka SC ka kdew ba ka jingpyntreikam ïa ka Roster ka dei beit naduh u snem ba la mynjur ïa ka shakhmat ym ban phai shadien,” ong u Bah Robertjune.
U la ong ba namar ïa ka OM la mynjur da ka Kynhun Myntri na kata ka daw ka shong tang ha ka mon ka Kynhun Myntri ban pynbeit ïa kane ka jingduna ha ka Roster system.
“Lada ka sorkar ka khot tang ïa ka jingïalang ka Kynhun Myntri ka la lah ban shimrai ban pynbeit hynrei lada ka khot da ka jingïalang jong baroh ki seng saiñ pyrthei kumba la kam da u symbud Myntri Rangbah ka jylla lei ka kham bha bad lada khot lei da ka dorbar kyrpang kata lei kaba bhatam, namar ka sorkar ka thmu ban khot ïa ka jingïalang baroh ki seng saiñ pyrthei na kata ka daw ngin pynpoi ïa ka kopi ka dorkhas sha baroh ki nongïalam seng saiñ pyrthei ha ki ryngkat ki rai bishar ba ngi aiti lang ha u Chief Secretary,” ong u Bah Robert.
U la ong ruh ba kat kum ka Reservation Policy la kdew ba ki kam kiba lait kiba dei ha ki kyrdan district la bhah beit 80% ïa ki Khasi- Jaiñtia bad Garo ha kajuh ka bhah khlem da bhah shuh 40 Percent ïa Khasi- Jaiñtia bad 40 ïa u Garo.
“Hynrei ki don ki ki tnat kiba khot thep kam ha ki kyrdan district kiba bhah 40% ïa u Khasi-Jaiñtia bad 40% ïa u Garo kaba long marpyrshah ïa ka kyndon ka Reservation Policy, bad na ka liang u Chief Secretary u la mynjur ba lehse ka don ka jingduna na ka liang kata ka tnat bad u la kular babn pynbeit ïa kate ka mat,” ïathuh u Bah Robert.
U la ong ba ka sorkar ka dei ba ka sorkar ka dei ban peit bha ïa kane ka jingrhem ka ding ha kaba ïadei ba ka jingdawa pynbeit ïa ka Roster system bad ka sorkar ka dei ban shimkhia ïa kane ka ding kaba rhem ïoh ba kan klang ha kano ma kano ka por kumba jia ha ka jingïakhih ïa ka ishu MBOSE.