Yn ym kyrtiang dien na ka rai ban pyntreikam ïa ka NEP 2020 ong u VC ka NEHU ïa ki MCTA

Shillong, Nailur 11 : U Vice Chancellor ka North Eastern Hill University (NEHU) u Prof Prabha Shankar Shukla ha ka sngi Nyngkong, ula ong ba ka University kam don jingthmu satia ban kyrtiang dien ne pynkylla ïa ka rai ban pyntreikam ïa ka National Education Policy (NEP)-2020 ha Jylla.
“Wat la katta ruh, ha ka jingpyrshang ban pynthikna ïa ka jingpyntreikam kaba biang tam kat kaba lah ïa ka Policy, ka University kan sa ïakren bniah bha ïa kino kino ki jingduna ne ki ishu kiba lah ban mih ha ka por ba pyntreikam ïa ka Policy, ka ban long ha ka jingïalang jong ka Academic Council ban sa wan” ong u Prof Shukla hadien ka jingïalang bad ka kynhun jong ka Meghalaya College Teachers’ Association (MCTA).
U Vice Chancellor ula kyrpad biang ïa ka MCTA ba kan ai ka jingïatreilang bad ka University khnang ban lah pyntreikam sani bha ïa ka NEP 2020. Kat kum ka jingong jong u, ka thong ba hakhmat eh ka long ban pynkhlaiñ ïa ka rukom ai jinghikai bad ruh ïa ka bha ka miat jong ki samla pule.
Ka MCTA ka la ïeng ban dawa weng noh ïa ka jingpynbna (Notification) ba pynmih ha ka 12 tarik Naitung, kaba bthah ïa baroh ki College ba pynïasoh bad ka NEHU ba kin pyntreikam ïa ka NEP bad phaidien biang sha ka Degree Course kaba rim.
Kat kum ka jingong ka Association, ka dei ka kam thok ba pylleiñ pylleiñ haba ka jingpynbna ka la kam ba ïa ka NEP yn pyntreikam kat kum ka rai ba la shim ha ka jingïalang ba 110 jong ka Academic Council.
Hynrei u VC ula ong ba ka jingïalang ba 104 jong ka Academic Council ka University ha ka 11 tarik Nailur, 2020, ka la shim rai “Ban pyntreikam ïa ka NEP 2020, haba rai ruh ban thaw ïa ka Task Force ban lah pyntreikam bha ïa ka Policy”.
Ula ong ba ka Academic Council kam ju thaw ïa kino kino ki Policy haba buh hakhmat ïa ka tarik ba dei sdang. Kano kano ka policy ba la thaw da ka Academic Council la khmih lynti ban pyntreikam da ka Executive Council khlem ka jingpynslem namar ïa ka policy la thaw bad pyntreikam na ka bynta ka jingbha jong ki kynhun bapher bapher. Naba ka Academic Council ka la rai pyntreikam ïa ka Ordinance, Regulation bad Syllabi, ka Executive Council kan hap ban pyntreikam khlem kano kano ka jingpynslem.
U VC ula ong ba haduh mynta, ka University kam pat shym la ïoh ïa kano kano ka shithi na ki Principal jong ki College ba la ïasoh, ba pynpaw ïa ki jingeh ha ka ban pyntreikam ïa ka NEP 2020 haba ïadei bad ka Four Year Undergraduate programme (FYUP).
Ha ka jingshisha, ka jingïalang ba la khot pynlong da ka University bad ki Principal jong ki College ba la ïasoh, ha ka 21 tarik Naitung, ka dei kaba la ïashimbynta da jan baroh ki Principal bad ki la pynpaw ïa ka jingsngewhun ïa kane ka sienjam. ïa ki minutes jong ka jingïakren, kaba don lut ïa baroh ki ishu ba la ïakren bad ki jingpynshai kiba mih, la dep ban sam lut sha baroh ki Principal.
“Ngi sngewthuh ba ka jingpyntreikam ïa ka system ba thymmai ka donkam ban hap ïapynbeit hangne hangtai ha ka ban lah weng ïa ki jingeh kiba mih. Lada don kino kino ki jingbym biang ha ka rai jong ka jingïalang ba 110 ka Academic Council ha ka por ba pyntreikam ïa ka policy, ïa kane yn sa pynbeit ha ka por ba pynthikna ïa ki minutes (mat ïakren) jong ka jingïalang ban wan jong ka Academic Council (111) kat kum ka policy” ong u Prof Shukla haba bynrap “Ka University ka la dep kren shai ba ïa baroh ki jingïarap kiba donkam ha ka por ba pyntreikam ïa ka Policy, yn sa ai sha ki College ba pynïasoh lait noh tang ka song pisa ”.
U Prof Shukla ula ong ba ki kam kiba ïaid kumba la kdew hangne ka la pynshai lut ba ka rai ban pyntreikam ia ka NEP 2020 ïa ki FYUP ka dei kaba la shim hadien ka jingïasyllok kaba ïar bha, ka jingïakren bad jingmynjur jong ki bor ba dei khmih jong ka University bad bynrap “Namar kata, ka jingkam ba rai leh donbor da u Vice Chancellor ka dei ka bym don nongrim satia”.
Nalor kane, u VC ula pyntip ba ka University ka la shimkhia ïa ki jingduna haba phai sha ki jingtei bad ki jingdonkam ha kiba bun ki college ba la ïasoh bad ka NEHU.
“Haba ïaroh ïa ki jingsngewkhia jong ka MCTA, ngi la thaw bad pynwandur ïa ka curriculum kiba lah ban pyntreikam naduh u snem 2023-2024 khlem da pynbun ïa ka jingshim klas bad ki jingtei na ka bynta une u snem” ula ong.
Ula ong ruh ba ka jingkam jong ka MCTA ba kan don ka jingtynrong kaba khia ha ka pisa tyngka ïa ki samla pule ruh ka dei ka bym don nongrim.