Shillong, Ïaiong 19 : Ka Khyndailad shen kan sa kylla dur noh hadien ba ka sorkar jylla lyngba ka tnad Tourism ka la thmu ban pynkylla lynti ïaid kjat noh ïa katei ka jaka, da kaba sdang naduh ka lad surokbah haduh ban da poi sha lad Umsohsun.
Haba kren bad ki lad pathai khubor ha kane ka sngi Balang, u Myntri ka tnad Tourism, Bah Paul Lyngdoh u la pyntip ruh ba ïa katei ka sienjam la kyrshan bad mynjur ruh da u Myntri Rangbah ka jylla, Conrad K Sangma.
“Kaba donkam eh ïangi ka long ban pyntreikam ïa ki aiñ bad ban leh ïa kata, donkam ban sdang shwa ïa kane ka Khyndailad nangto naba rung shapoh kan dei beit tang ka lynti ïaid kjat jong ki paidbah. Na bynta ki nongdie madan ngi don ka jingpynkhreh la ka jong,” u la ong. Katkum ka jingong u Myntri, ban shait ban khlain ki nongshong shnong donkam ban ïaid kjat bad dei na kata ka daw ba ka sorkar ruh ka la shim ïa katei ka sienjam ban pynkylluid ïa katei ka bynta jong ka Khyndailad ba kan long noh tang ka jaka ïaid kjat khlem don shuh ka jingpynwit na ki kali lane na ki nongdie madan.
“Ngin pyntikna ba hadien ba ngi la khang ïa ki kali ban rung ym dei pat ban mih bujli da ki nongshong madan. Ka jingmut hi ka long ba ki nongshong shnong ki dei ban long kiba koit ba khiah bad kumta donkam ban iaid. Hynrei haba ïaid pat ïaid khlem da tieng ïoh shah tynrah ha ki kali ne shah tynrah ha u nongdie madan,” ong u Myntri.
Ha kajuh ka por pat u la ong ba watla kin ym shah shuh ban ïaid kali na katei ka jaka (ym dei ïa ka GS Road) hynrei yn ailad pat tang ïa kito kiba sah ha katei ka jaka. U Myntri u la pyntip ruh ba mynta ki la pynkhreh wat ban khang pynpah horn noh ha kylleng ki bynta ba kongsan kiba don ha nongbah Shillong.
Haba kren pat haba ïadei bad ka ishu jong ki nongdie madan u Myntri u la ong ba ïa katei ka mat kin sa kren bad ka tnad Urban Affairs, ka Muncipal Board bad ruh bad ka tnad PWD Roads nalor kiwei kiwei ki tnad ba dei peit.
