Yn shong jingïalang ki ar District ban wanrah ka shongsuk shongsaiñ ki Khasi Pnar ha Block-I: HBDRF

Jowai, Rymphang 10: Ka Hynñiewtrep Border Disputed Redressal Forum (HBDRF) mynta ka lah sngi U Blei kala leit ban kynduh ïa u Deputy Commissioner ba thymmai ka West Jaiñtia Hills District u Abhinav Kumar Singh, lAS, haka jingïadei bad ka jingwanrah ïa ka shongsuk shongsaiñ ki Khasi Pnar kiba shong ba sah ha Block -1 (Labang nongphyllut) khamtam ha kum kane ka por Election MDC.
U Charman ka HBDRF ma Chandame Sungoh ha ka jingkren sha ki lad pathai khubor ula ong na ka liang ka seng naduh kine ki sngi bala dep kata ha ka 27 tarik u Kyllalyngkot kila dep ban ujor halor kane ka jingeh kaba lah ban mih ha ki por Election, namar kane ka shait jia man ki por ba don ka Election ha kitei ki jaka khappud.
Ula pyntip na ka liang ki ar tylli ki District na Assam bad Meghalaya kin pynlong ïa ka jingïalang (Video Conference) haka 14 tarik mynta u bnai, na ka bynta ban ïaidbeit ïaid ryntih ka Election khnang ban nym mih kino kino ki jinghuri hura ha kitei ki jaka khappud.
Shuh shuh ula pynsngew ba ki briew na katei ka thaiñ Block-1 jong ka thaiñ Labang Nongphyllut kila kloi ban wan rung shapoh ka Meghalaya, ban long kum ki nongshong shnong ba pura, namar ki nongshong shnong mynta kila kyntaid ruh ïa ki kam pynroi kiba wan na ka Assam bad kumjuh kila kyntaid ban leit thep vote (boycott) na ka bynta ki MLA bad MDC jong ka Assam ha kine ki sngi bala dep.
Ha kaba ïadei bad ki kam ïalap Election MDC sha JHADC da ki kynhun saiñ hima sima hapoh kitei ka thaiñ na ka liang ki bor District ruh kila pyrshang ban ïakren ba ym don kino kino ki jingkhanglad ïa kiba kwah ban pynlong jingïalap, namar kine baroh ki mih tang na ka daw ka jingïa bishni jingangnud para nongkyrshan jong ki seng saiñ hima sima.
Na ka liang ka Forum kala pynpaw haki por Election bala dep ka shait don ka jingmaham ka jingpyntieng pynsmiej bad ka jingpyndik ïaka leit ka wan jong ki Khasi Pnar kiba shong basah haka ne ka thaiñ daki briew bad ki kynhun jong kawei pat ka jaitbynriew.
Kumta ka Forum ka kyrpad ïa U Deputy Commissioner ba un shim khia ban ïakren bad u Deputy Commissioner jong ka West Karbi Anglong District ban pynneh pynsah ïaka aiñ ka kanun bad ka shongsuk shong saiñ khnang ba kan ym don shuh ka jingpyntieng pynsmiej bad ka jingpynthud jingpynwit haka leit ka wan jong ki paid Khasi Pnar ha kum kane ka por Election MDC.