U Nongïalam ka VPP u dei uba dang duna bha ka jingshemphang ha ka saiñ pyrthei : Dy CM

Shillong, Rymphang 10 : U National General Secretary ka NPP uba dei ruh u Symbud Myntri Rangbah ka jylla u Ma Sniawbhalang Dhar mynta ka Lah Sngi U Blei u la ong ba u Nongïalam ba hakhlieh duh ka Voice of People Party (VPP) u bah Ardent Miller Basaiawmoit u dei uba dang duna bha ka jingshemphang ha ka saiñ pyrthei.
Haba kren ha ki jingïalang ïalap election na ka bynta u kyrtong ka NPP na ka Raliang Constituency u ma Bison Roy Iano ha Biar bad Rtiang mynta ka sngi u ma Sniawbhalang u la ong “ Khlem ka jingshemphang kan long kaba eh haduh katta katta ban shakri ïa ki paidbah. Kumta ngi donkam ïa ki riewshemphang ha ka saiñ pyrthei ban shakri ïa ki paidbah”.U la ong ba u Myntri Rangbah ka jylla u Conrak K Sangma u long kum u Nongñiah ïa ka Bus MDA ba lam khamt ïa ka sorkar da ka NPP mynta la hynñiew snem kumta u la long uba shemphang bha bad ym donkam ban khuslai”.
“Hooid u President ka VPP u la long teng u CEM ka KHADC hynrei tang hapoh hynriew ne hynniew bnai ka EC jongu ka la khyllem noh. Ka jingsheptieng palat ïa u Dr Mukul Sangma ba u byrngem ban pynduh ïa ka jinglong MLA bad kumta u la hiar shuki noh kum u MDC. Kane ka jia namar ba um pat shemphang ha ka saiñ pyrthei” ong u ma Sniawbha haba kren ha Rtiang. “ U ne u President ka VPP u la kynthoh ruh halor ka shongsang da kaba ong ha sor kam don hynrei ka jur sha nongkyndong kane ka pynpaw ba kum u nongïalam um pat long uba shemphang. Une u nongïalam ka VPP u tip tang kumno ban wad daw ïa ki Rangbah Shnong hynrei u kam pat ba ka party jongu ka dei kaba ieit jaidbynriew. Kumno phin ieit jaidbynriew haba phim nang ban burom ïa la ka tynrai kata ban burom ïa ki Nongsynshar Shnong” bynrap biang u ma Sniawbha.
U la kynnoh ruh ba ka don ka jingïapait ïapra hapoh ka VPP. U la ong “ Ki don sawngut ki MLA bad mynta uwei na ki um ïatrei lang shuh bad ka party bad mynta u Prah u la kylla Pra. Tang ha ka VPP ba ïa ka tiket jong ki kyrtong MDC la ai khlem da ïamir jingmut lang bad u MLA bad kane ka pynpaw ba une u nongïalam ka VPP um pat long u riew shemphang ne uba kwah leh marwei nadong shadong”
U la kyntu ïa ki paidbah ba kim dei ban shah ïalam bakla ha kita ki jingkynnoh ba ka NPP bad ka BJP ki ïadei kijuh. Kumno kan lah ban long ba ka Kot bad u tiew Lotus kin ïalong kawei. Wat shah ïalam bakla ha kum kita ki jingkynnoh namar ka NPP ka don la ka jong ka nongrim treikam ban shakri ïa ki paidbah.
U la ong shuh shuh ba ka Meghalaya ka ïoh bun ki kam pynroi pynpar namar ka sorkar MDA ba la ïalam da ka NPP ka ïatrei ryngkat ryngkat bad ka sorkar pdeng ym dei kum kiwei ki jylla khamtam kum ka West Bengal kaba ka Myntri Rangbah katei ka jylla ka shu ther beit ïa u Myntri Rangbah duh ka ri bad na kata ka daw kim ïoh ki kam pynroi pynpar.
U ma Sniawbha u la kyntu ïa ki paidbah ban jied ïa u ma Bison Roy Iano ban pynthikna ba kin ïoh ïa ka roi ka par namar lada jop ha ki District Council kan long kum ka sorkar double engine namar ha District Council bad sorkar yn synshar da kajuh ka party.
U la kular ruh ban peit ïa ki jingeh jong ki nongniah trok bad u kyntu ïaki ba kin ai ka jingkyrshan ba pura ïa ka NPP.
Haba kren ha Biar u ma Sniawbha u la ong ba ka VPP ka kob ba tang ka jingieit jaidbynriew ka la biang ym donkam shuh ïa ka roi ka par. “ Kat kum ka jingsngew jongnga lada phi ieit jaidbynriew phi dei ban wad ki lad ki lynti ban wanrah ruh ïaka roi ka par ban kyntiew ïa ka ïoh ka kot jong ki paid nongshong shnong ka jylla” ong u ma Sniaw. U la ong baroh shi katta ki paidbah ki jied ïa ka VPP namar ka jingrwai khamtam ha ka election MP hynrei mynta kam long shuh kumta ki paidbah ki la sdang mad, sdang sngewthuh haba ki la ïa kynduh.
Shuh shuh ha Ksehrynshang u la ong ha ki 15 snem mynshuwa, ka election MDC kam da shongshit eh kumba long mynta ka kynti. Balei namar la 9-10 tylli ki bnai naduh ba don kane ka party VPP, ka lah pynbam klop bam sap lut ïaka jabieng ki khynnah samla, ka lah pynsngewthuh bakla ha ki liang baroh. Namarkata kiba 18-20 snem ka rta ki lah shah pynbeij.
“Nga ong ïa phi kawei ba ka VPP kam dei hi ruh ban shim bynta ha kane ka MDC election namar ki kwah ban pynduh ïa ki district council lyngba ka jingdawa ïa ka article 371” pynkut u ma Sniawbhalang.