Jowai: U District Magistrate ka West Jaiñtia Hills ula pynmih ïa ka hukum hapoh ka kyndon 144 Cr. PC ha kaba ïadei bad ka jingthang ne pynbthei ïa ki bom pataka ha ki sngi rakhe ïa ka jinglehkmen Christmas bad snem thymmai ha West Jaiñtia Hills.
Katkum kane ka hukum ba la pynmih mynta ka sngi yn shah ban pyndonkam ïa ki bom pataka tang naduh ka por 11:55 PM haduh ka por 12:30 AM ha kitei ki ar sngi ba la kdew haneng.
La khang ruh ban pynbthei bom pataka hapoh ka jingjngai kaba 100 metar na ki Hospital, ki Nursing Homes, ki Primary bad District Health Care Centres, ki jaka pule, ki ïingbishar, ki jaka mane blei ne ha kino kino ki jaka kiba la pyntip ba ki dei ki Silent Zone.
U DM ula pyntip ruh ba tang kito ki dukan kiba la ïoh license na ka ophis u Deputy Commissioner ka District ki lah ban die ïa ki bom pataka bad kiwei de ki jingpynbthei, tangba ki dei ruh ban bud ïa ki kyndon jong ka Central Pollution Control Board.
