Shillong, Nailar 27 : U Myntri Rangbah duh u Narendra Modi un sam palat 51,000 tylli ki shithi thungkam sha ki shipai CAPF ba dang rung kam thymmai ha ka 28 tarik Nailar, 2023. Ha ka jingïalang lyngba ka bor internet u Myntri Rangbah duh un plie ïa ka bynta kaba 8 jong ka Rozgar Mela bad un ai jingkren ha 45 tylli ki jaka.
Hapoh ka Mission Thung Kam, ka Sorkar India bad katto katne ki Jylla/UT ki la pynlong ïa ki Rozgar Mela ha kylleng ka ri bad sam ïa ki shithi thung kam sha ki lak ngut ki samla man ka bnai. Ha ki jingïalang bapher bapher jong ka Rozgar Mela, la pynbeit ïa ka jingïalang ban long lashai ka sngi ha 45 tylli ki jaka ha kylleng ka ri ban sam 51,106 tylli ki shithi thung kam sha kiba shah thung kam thymmai.
Ha nongbah Shillong, u Myntri Khynnah jong ka Sorkar Pdeng ba dei khmih ïa ka MSME, u Bhanu Pratap Verma un pynïaid ïa ka jingïalang ban long ha Rai Auditorium, HQ DGAR, Laitkor.
Lyngba kane ka prokram Rozgar Mela, ka Tnat kam Pohïing jong ka sorkar pdeng ka\ la pynrung kam ïa ki samla ha ki kynhun shipai bapher bapher jong ka sorkar pdeng ki CAPF kum ka CRPF, BSF, Shashtra Seema Bal (SSB), Assam Rifles, CISE, ITBP bad Narcotics Control Bureau (NCB) kumjuh ruh ka Tnat Pulit jong ka Delhi.
Kiba shah thung kam thymmai kin lah ban ai jingshakri ïa ka ri da kaba ïasoh bad ki kam jong ki ha ki CAPF bapher bapher bad kin sakhi ïa ka India@2047. Kiba shah thung kam thymmai, kiba la shah jied na kylleng ka ri, kin ïasoh bad ka kam ha ki kyrdan bapher bapher kum Constable (General Duty), Sub-Inspector (GD) bad ki Non-GD Cadre Post ha ki kynhun bapher bapher hapoh ka Tnat kam Pohïing jong ka Sorkar Pdeng.
Ka Rozgar Mela kalong ka sienjam na ka bynta ka jingpynurlong ïa ka jingkut jingmut jong u Myntri Rangbah duh na ka bynta ka jingpynmih lad ïoh kam.
