Shillong, Nailar, 27: Da ka jingshimkhia jong u MDC ka Mawkhar Pynthorumkhrah Constituency u Bah Pynshngaiñ N. Syiem, ka Dorbar Shnong Lum shyiap ha ka sngi Saitjaiñ ka la ïoh ïa ka trok kit ñiut ba la pyllait paidbah ha ka jingïalang kaba lyngkot ha Taxi Stand Lumshyiap.
U Bah Pynshngaiñ Syiem uba long ruh u Deputy Chief Executive Member (Dy. CEM) jong ka Khasi Hills Autonomous District Council (KHADC) uba la long kum u Kongsan ha kane ka sngi, u la ïathuh ba ïa kane ka trok kit niut la bei pisa ban thied da ka District Council lyngba ka Tied Grant jong u snem 2020-21 na ka Finance Commission.
Ha ka jingot ribbon ïa kane ka trok kit niut, la sakhi lang da u Rangbah Shnong u Bah Phira Khongphai, u Secretary Shnong u Dr Khampher Phawa, ki nongkitkam jong ka Executive Committee, ka President jong ka Seng Kynthei ka Kong Marylin Pathaw, u President ka Seng Samla u samla Khrawpyrkhad Mynsong lem bad ki paidbah nongshong jong ka shnong Lumshyiap.
U Bah Pynshngaiñ Syiem haba kren ha kane ka sngi u la pynpaw ba ka jingpynïoh jong u ïa kane ka trok kit ñiut na ki thliew ing jong ki nongshong ka shnong Lumshyiap ka long hadien ba ki nongïalam ka shnong ki la pan jingïarap na u namarba ka kali kaba rim kam lah shuh ban treikam hadien ba ka la don kumba 11 snem tam eiei.
U la kyntu ïa ki nongpynïaid ïa kane ka kali ba kin pyndonkam hok katkum ka jingdonkam bad ban ban ym pyndonkam bakla lane na ka bynta ka jingmyntoi shimet jongno re jongno.
