Tang 10-15 ngut ki Pulit ha Khappud, 50-60 ngut ki Pulit ban ïada ïa ki Karkhana: HYC
Shillong, ‘Nailar, 27: Ka Hynñiewtrep Youths Council (HYC) ka la kynthoh tyngeh ïa ka Sorkar Jylla kaba phah ïa ki Pulit pahara ha khappud tang 10-15 ngut katba ïa ki Karkhana pynjot mariang la pynbiang ïa ki Pulit pahara 50-60 ngut.
“Ha kine ki khyndiat sngi, ngi ïohi ba don ar jait ki Pulit ha kane ka jylla ka jong Ngi. Ka kynhun Pulit kaba nyngkong ka dei jong kito ki Pulit kiba bom kput ïa ki paidbah, ki Pulit shynrang kiba ktah kti bad bom dusmon ïa ki longkmie, ki Pulit kiba don 50-60 ngut kiba ieng rasong ha ryngkat ki tiar ïaleh kum ki Tear Gas bad ki suloi ban ïada ïa ki Karkhana jong ki bar jylla bad kumjuh ruh ka kynhun Pulit kaba shah hukum ha ki heh bar jylla jong ka Topcem ban bom kput ïa ki khun Hynñiewtrep. Sa kawei pat ka kynhun Pulit ka dei kaba don ha khappud (Block 1 Area) Khanduli Sector. Kine ki Pulit ha khappud kiba don kumba 10-15 ngut kiba hap ban mareh na ki jaka ap pahara ban ïada ïa la ka jingim namarba ki tieng palat ïoh shah lun maw bad shah siat da ki jri ha kita ki Karbi,” la ong u kyrwoh ba la phah u General Secretary ka HYC sha ki lad pathai khubor ha ka sngi u Blei.
“Ki jingkylli kiba ngi kwah ban kylli na u Myntri ka tnat Kam Pohing ka Jylla, ka long hato hakhmat ka Sorkar Jylla ka dang kham kor ki karkhana pynjot mariang ne khamkor u pud u sam bad ki khun Hynñiewtrep bashong basah ha Khappud? Balei la buh Pulit tang 10-15 ngut ha Khanduli Sector hynrei da ki 50-60 ngut pat ban ïada ïa ki Karkhana pynjot mariang? Balei la ai hukum ïa ki Pulit ïada karkhana pynjot mariang ban pyndonkam Tear Gas, ban bom kput ïa ki paidbah, ban phah ktah kti ha ki Pulit shynrang ïa ki longkmie katba ym shym lah ai hukum pat ïa ki Pulit ha khappud ban pyndonkam ïa ki suloi ba ki bat ha ki kti ban ïada ïa u pud u sam ne ban siat Tear Gas ïa kita ki Karbi kiba wan rung shapoh u pud u sam ka Jylla ha Lapangap?” la buh jingkylli ka HYC.
“Ka Sorkar bad ka tnat Pulit ki dei ban jubab halor kine ki jingjia. Hato kine ki Pulit ki phet hi ba ki tieng ïap bad ba duna briew ne namarba kim ïoh hukum na ki bahalor ban bom bad siat ïa ki Karbi kiba thmu pynïap ïa ki Pulit bad ki paidbah ha Khappud? Balei ngi ong ba ki Karbi ki thmu pynïap ïa ki Pulit bad ki khun Hynniewtrep ha Lapangap ka dei namar katkum ki Pulit Meghalaya, lada phi lun maw ne siat da ka jri kata ka ladei ka kam thmu pynïap briew bad ïa kata ngi lap lyngba ka jingjia ba dang shen ha Tura ba shah lun maw ka Mini Secretariat, ki Pulit ki la thep ha ki kyndon thmu pynïap briew ïa ki paidbah kiba don ha kato ka sngi. Lada ka Sorkar kam lah ban ai hukum ïa ki Pulit ha khappud, te balei pat la ai hukum ban siat Tear Gas ïa ki nonghikai, balei la ai hukum ban bom kput da ki lathi ïa ki longkmie ha Lumshnong bad balei la ai hukum ban siat ïap ïa u (L) Cheristerfield Thangkhiew?” la buh jingkylli shuh shuh ka HYC.
“Ngi dawa ba ka Sorkar ka dei ban phah da ki spah ngut ki Pulit ha man ki Border Out Post (BOP) bad ha ki Out Post (OP) ha ki khappud ha ryngkat ki tiar ïaleh kiba biang bad nalor kata ka dei ban ai hukum noh mardor ïa ki Pulit ba ki dei ban pyndonkam ïa ki Tear Gas, ban kawut lathi bad siat ruh lada donkam ban ïada ïa u pud u sam bad ïa ki paidbah ha khappud,” ong u kyrwoh.
“Lada ka Sorkar kam nud ban phah Pulit da ki spah ha ki BOP bad OP ha ki khappud ha ryngkat ki tiar ïaleh bad ka hukum kaba shai, na ka liang ka seng ngi dawa ba ka la bha ïa ka Sorkar ba kan shu ai noh da ki tiar ïaleh kum ki suloi, ki kuli bad kiwei kiwei ki tiar ïa ki riewpaidbah ha khappud ba kin ïada hi noh ïa la ka khyndew ka shyiap bad ïa la ka jingim namar kumba ka long mynta ym i shaniah ïa ki Pulit ka Meghalaya,” la kynthoh ka seng.