Shillong, Nailar 27 : U Myntri Rangbah Duh ka Ri u Narendra Modi ha ka jingai jingkren ha ka bynta kaba 104 jong ka Mann Ki Baat u la ai jingïaroh ïa u Bah Brian D Kharpran Daly na Meghalaya na bynta ki jingnoh synniang jong u ha ki kam kiba ïadei bad ki krem ki kroh ha Meghalaya. U Bah Brian u la trei da ki phew snem ban wad bad pynsaphriang jingtip shaphang ki krem ha Meghalaya.
Ha ka jingai jingkren jong u, u Myntri Rangbah Duh u la ong, “Nga dap da ka jingkmen ban ïathuh ïa phi shaphang u Bah Brian D. Kharpran. U dei uba sah ha Meghalaya bad u don ka jingsngewtynnad ïa ka speleology. Kane ka mut ka jingpule shaphang ki krem.” U Modi u la ong ruh ba u Bah Brian u la sdang sngewtynnad ïa kane ka kam hadien ba u la pule katto katne tylli ki kot bad u la pyrshang nyngkong ïa kane ka kam ha u snem 1964 ha ka por ba u dang long u khynnah skul.
U la ong ïa ki nongsngap ba ha u snem 1990, u Bah Brian bad ki paralok jong u ki la seng ïa ka kynhun bad lyngba kane ka kynhun, ki la sdang ban wad ïa ki krem ka Meghalaya ki bym pat paw pyrthei. U Myntri Rangbah Duh u la ong, “Katba dang ïaid ka por, u Bah Brian bad ka kynhun jong u ki la lap palat 1700 tylli ki krem ha Meghalaya bad ki la kyntiew ïa ka jylla Meghalaya ha ki kam kiba ïadei bad ki krem ha kylleng ka pyrthei.” U la ong ruh ba ka Meghalaya ka don ki krem kiba jylliew bad kiba jrong tam ha India.
U la ïaroh ruh ïa u Bah Kharpran bad ka kynhun jong u na ka bynta ki jingpyrshang jong ki ban peit ïa ki jinglong jingman jong kine ki krem. “U Bah Brian bad ka kynhun jong ki, ki la lum jingtip shaphang ki jingim kiba don ha kine ki krem ki bym ïohi ha kiwei kiwei ki bynta jong ka pyrthei. Nga ïaroh shisha ïa ki sienjam jong kane ka kynhun.”
U Myntri Rangbah Duh u la kyntu ruh ïa ki nongsngap ba kin leit sha Meghalaya bad ban leit peit ïa kine ki krem.
