Yn pyrkhing noh ka Medical Bond Policy ïa ki samla pule doktor na bhah sorkar – Health Minister

Shillong, Ïaiong 29 : U Myntri ka tnad ka Koit ka Khiah ka Sorkar Jylla Bah Wailad Shylla ha ka sngi Balang u la ong ba ka Sorkar Jylla ka dang wad ki lad mynta kumno ban pynkylla noh ïa ka soskular ba ki ju ïa teh bad ki samla pule doktor kiba ju pule na ka bhah sorkar lane ka Medical Bond Policy khnang ban pyntikna ba ynda ki la dep pule kin wan phai ban trei sha ka jylla lajong.
Ha ka jingïakren bad ki lad pathai khubor, u Myntri ula ïathuh ba kane ka jingpyrkhat kadei hadien ba ka jylla ka la sakhi ïa ka jingkyrduh doktor khamtam haba ïadei bad ki doktor specialist ban leit trei ha ki nongkyndong.
Shwa kane, u Myntri u ïathuh ba man u snem ka jylla ka ju phah bun bha ki samla ban leit pule doktor na ka bhah sorkar hynrei ynda ki la dep pule pat bun kim ju treh ban wan trei sha la ka jong ka jylla ban pyndep katkum ka soskular ne ka Bond.
“Ïa kane ka bynta ngi la ïa kren bad u Myntri Rangbah bad kumjuh bad tnad ka Koit ka Khiah bad kumta ngi dang wad ki lad ki lynti ban wad kumno lada pynkylla noh ïa ka Bond Policy namar bun na ki ishu kaba ngi lap ka dei ba watla ngi phah bun bha ban leit pule doktor hynrei bun na ki, kim treh ban wan shakri pat ha ka jylla khamtam haba ïadei ban leit trei ha ki nongkyndong,” u la ong.
U Myntri u la pynpaw ruh tang da kaba ki leh kumta kin lah ban pynbeit bad pyntikna ba kito kiba leit ban pule doktor na ka bhah jong ka sorkar kin wan ban shakri pat ïa ka jylla haba ki la pyndep ïa ka jingpule.
Ha kajuh ka por u Bah Wailad u la pyntip ba ki sngewkmen ba mynta u snem ka jylla ka la ïoh ban sdang ïa la ka jong ka jaka pule doktor ka Shillong Medical College.
“Kumba phi ïohi hi, mynta u snem ngi la lah ban sdang ïa ka kynhun ba nyngkong ban pule doktor ha ka Shillong Medical College. Kane ka mut ba ka jingpule doktor ha ka jylla ka la nang kiew,” u la ong. Shuh shuh u ïathuh ruh ba ka sorkar mynta kan kyntiew kyrdan ïa ki jaka pule nurse lane ki nursing school sha ki college ban plie lad shuh ïa kiba bun ki samla kiba kwah ban pyndep ïa kane ka jingpule.
Haba kren pat halor ka jingduna ki doktor Specialist ha ki nongkyndong, u Myntri u la ïathuh ba ka tnad ka ju phah ïa ki doktor ba kin leit pyntbit ha ki course kiba shipor.