Shillong, Nailar 26 : Ka sorkar ka la rai ban pynlut 75 lak tyngka ban thied 5 tylli ki Bomb Inhibitor khnang ban pynkhlaiñ shuh shuh ïa ka Bomb Detection and Disposal Squad (BDDS) hapoh ka jylla.
Kane ka paw ha ka list jongka Supplementary Demands for Grants bad Supplementary Appropriation na ka bynta u snem 2024-25 ba la wanrah hapoh ka ïing Dorbar Thawaiñ ka jylla ha ka sngi ba sdang ka dorbar synrai kata ha ka 23 tarik mynta u bnai.
“ Kane ka pisa ba 75 lak tyngka ka dei ka jingpynlut jongka ophis u SP Special Branch ban thied 5 tylli ki Bomb Inhibitor ban pynkhlaiñ ïa ka BDDS ha ka Eastern bad Western Range jongka jylla. Ka jingthmu ka long ban pynkhlaiñ ïa ka Bomb Squad jongka jylla ba kan lah ban lap dien bad pynduh ïa kino kino ki jingthmu pynbthei bom ha kano kano ka jaka”.
La tyrwa ruh ban pynlut 50,56,600 lak tyngka na ka bynta ban thied ïa ki ksew kiba triem ban bud dien bad sma dien ïa ki drok. ïa kine yn thied da ka Police Service Cannines (PSK’S) na ka bynta ka K-9 Unit ba ha Shillong bad Tura.
Ka sorkar ka pan pisa ruh 3,88,50,000 na ka bynta ban siew ïa ka tulop jong ki Home Guard Valunteers kiba la thung ban peit bad pynïaid kali hangne ha East Khasi Hills ha Shillong bad ha West Garo Hills ha Tura.
