Rakhe ka NIT Meghalaya ïa ka National Space Day ban pynshlur ïa ki samla pule halor ki kam haw haw

Shillong, Nailar 26: Ka NIT Meghalaya da ka jingsngew sarong ka la rakhe ïa ka National Space Day kum shi bynta jong ka jingjop jong ka jinglah ban wan hiar ka India Chandrayaan-3 mission. Ïa kane ka prokram la plie da Prof. Pinakeshwar Mahanta, Director, NIT Meghalaya. Ha kane ka prokram la donlang Prof. Ujjwal K. Saha, Professor, Mechanical Engineering, IIT Guwahati, ka Rekha B. Gogoi, Scientist NESAC, Shillong, Prof. Prasan K. Sahoo, Professor, Chang Gung University, Taiwan, Prof. Diptendu Singha Roy, Dear R&C, NIT Meghalaya, u Rakesh Kumar Sarmah, Scientist NECTAR, Shillong bad kiwei kiwei.
Ha ka jingkren pdiang sngewbha Prof. Pinakeshwar Mahanta u la ai ka jingkren kaba ïadei bad kane ka jingdonkam ban pynïar ïa ka kam shang sha ki kam haw haw bad ka bynta jong ki kam pule ha ka ban kyntiew ïa ki kam saïan kaba long kaba kongsan ha kane ka juk kaba mynta. Ha kane ka prokram ka la don ruh ka jingpyni ïa ka live streaming jong ka National Space Day kaba dei ka prokram kaba kongsan na ka Bharat Mandapam, New Delhi.
Ïa kane ka workshop kaba shi sngi halor ka National Space Day la pynlong ha NIT Meghalaya. U nongai jingkren uba nyngkong ha kane ka sngi sdang la ai da Prof. Ujjwal Kumar Saha, Professor ka Mechanical Engineering, IIT Guwahati. Ka jingkren jong u ka la batai halor ka jingdonkam jong kane ka National Space Day bad u la banjur ruh halor ka kam saïan bad teknoloji bad ki kam wadbniah.
Ïa kane ka prokram la pynlong ha Mini Auditorium, ha kaba bun na ki paidbah, ki samla pule bad ki nongtrei ki la donlang. Katba Prof. Saha bad u Rakesh Kumar Sarmah ki la ai ka jingkren halor ki kam teknoloji bad ki kam pynneh pynsah ïa ki kam pynroi pynsan. U la ban jur ruh halor ka jingdonkam ki kam teknoloji, khamtam eh ha ki kam haw haw.
Katba ka Rekha B. Gogoi ka la kren halor ki kam haw haw jong ka ri India kiba long kiba donkam ban shim jingkitkhlieh nalor kiwei pat ki kam. Ha ka kylla nohphai sngi, Dr. Rishitosh K. Sinha, Scientist, Physical Research Laboratory, Ahmedabad la ai ka jingkren lyngba ka online halor ki jingjop jong ka jingwan hiar u Vikram bad Pragyan rover journey (RJ) halor u bnai. U la pynshlur ïa ki samla pule ban pynïasoh bad ka Indian Space program. Na ka liang Dr. Kinsuk Acharaya, Associate Professor, Physical Research Laboratory, Ahmedabad la shim bynta da kaba ai jingkren halor ka “Search for Extra-terrestrial Life”, ha kaba u la pynïar halor ki kam kiba ïadei ba sha lyndet jong ka pyrthei.
Haba pynïasynriem bad kine ki jingkren, Prof. Pinakeshwar Mahanta, Director, NIT Meghalaya u la plie ïa ka telescope ha tnum ïing jong kane ka jaka pule ha kaba la wan jngoh da ki samla pule kiba shemphang. Ha kane ka sngi ka la don ruh ka jingi nam ïa ki drone kaba la pynlong ha Admin Block Front, kaba pyni ïa ka jingkiew ki kam drone technology ha kaba ïadei bad ki kam wad bniah ha ki kam haw haw.
Ha kane ka sngi la pyni ruh ïa ki jingshem thymmai halor ka unmanned aerial vehicles (UAVs), ki jingïakob Poster bad ki jingkyntip ha kaba la shim bynta da ki samla pule kaba ïadei ruh ba kam Indian Space mission. Ïa kine ki prokram la pynlong lyngba ka jingïatreilang da ka Astronomy Club, Student Activity Centre (SAC), NIT Meghalaya. La pynlong ruh ïa kane ka prokram pyni ïa ka jingïaid ki mawmer jong ka NIT Meghalaya, kaba la rakhe ruh ïa ka jingjop ka India ha kaba ïadei bad ki kam wadbniah ha haw haw bad ban pynshlur ïa ki samla pule ha kaba ïadei bad kane ka bynta.