Yn pynlong ka Telecommunications ïa ka jingpyrshang ïa ka Cell Broadcast Alert System ha ka 30 tarik Risaw

Shillong, Risaw 28 : Ka Department of Telecommunications (DoT) ha ka jingïatreilang bad ka National Disaster Management Authority kan pynlong ïa ka jingpyrshang ïa ka Cell Broadcast Alert System ban kyntiew ïa ka lad ai jingtip ba kyrkieh ha ki por jingjïalynshop ki bor ka mariang bad pynthikna ka jingshngain bad ka bha ka miat jong ki nongshong shnong.
La pynlong ïa ka Cell Broadcast Alert System ha man ka jaka ai jingshakri ki lad Telecom. Ïa kine ki test yn pynlong na ka por sha ka por ha ki thain bapher bapher ha kylleng ka ri ban peit ïa ka jinglah treikam jong ki lad ai jingtip ba kyrkiehba la pynbiang, jong ki Mobile Operator bapher bapher bad ka Cell Broadcast System.
Ka Cell Broadcasr Alert System kadei ka teknoloji kaba la bit la biang katkum ka juk mynta kaba plie lad ïa ngi ban phah ïa ki jingai jingtip ba donkam ha ka por kaba biang ban ïada na ki jingjia lynshop ki bor ka mariang sha baroh ki mobile hapoh ka jaka ba la ithuh, khlem da khein la ki nongïoh jingtip kidei kiba shong ba sah ha ka thain lane kiba shu wan kai.
Kane kan pynthikna ba ka jingai jingtip ba kyrkieh bad kaba donkam ka poi katba lah sha bun ki briew ha ka por kaba biang. La pyndonkam da ki kynhun sorkar bad ki jingai jingshakri ba kyrkieh ban pyntipïa ki paidbah shaphang ki jingma bad ban ai jingtip ïa ki ha ki jinglong jingman kiba donkam. La pyndonkam ïa ka Cell Broadcast ban ai jingtip kyrkieh, kum ki jingmaham ba ïadei bad ka suin bneng (nuksa kum, Tsunami,jingshlei um, khynniuhjumai, ki jingpynbna ban mih na ki jaka ba don jingma, bad kiwei kiwei ki jingtip ba kongsan).
Ha ka por jong ka jingleh ïa ka test, ki briew ki lah ban ïoh ïa ki jingtip ba kyrkieh ha ki mobile phone jong ki. Ka DoT ka pynthikna ba kine ki jingai jingtip kidei shi bynta jong ka kam ba ïadei bad ka jingtest ba la saindur bad ban nym shim ïa ki kum ka jingai jingtip ba shisha. Man ka test alert kan kdew shai ba kadei tang ka Test Message ban lait na ka jingkulmar jingmut.
Ha ka 30 tarik Risaw 2023, yn pynlong ïa ki test ha jylla Meghalaya. Katkum ka jingbit jingbiang jong ka system, ka lah ban don ki jingkylla ha ka por ba la buh ban pynlong ka jingpyrshangha ka khyllipmat ba khatduh khlem kanokano ka jingai jingtip.