Guwahati: Ka Special Task Force (STF) jong ka tnat Pulit ka Jylla Assam ka la ïoh kurup bun bah ki dawai jyrhoh na Lumshnong, East Jaiñtia Hills District da ka jingïarap jong ki Pulit ka Jylla Meghalaya.
Ki Pulit ka Jylla Assam kiba la ïoh jingtip kaba bniah na ki tnat syntiat shaphang ka jingthmu ban shalan ïa u drok na Agartala, Tripura lyngba ka Jylla Assam, mar mar ka kynhun Pulit STF ka la pynlong ka jingpynap ktem ban ïoh khang kdong ïa kawei ka kali kaba kit ïa ki jingdih be-aiñ. Ka STF ka la kthong ïa ka kali kaba don ïa u nombar RJ11-GB-0508, na Guwahati bad ïoh khang kdong ha ka shnong Lumshnong, Meghalaya.
Ha ka jingtalasi ïa kane ka kali, ka STF ka la ïoh kurup 375 tylli ki synduk ba la thep 37,500 bilor ka dawai Phensedyl, ba la buhrieh bha hapoh u jingbam syiar. Ka STF ka la kem ïa u nongñiah bad kurup ruh ïa ki dawai phensedyl bad ïa ka kali kaba kit ïa kine ki dawai.
Naduh ba ka Sorkar Assam ka la pynbna thma pyrshah ïa u drok, ki Pulit ki la ïoh kurup bun bha ki jingdih pynbuaid naduh u heroin, brown sugar, ki dawai kuli Methamphetamine, dawai phensedyl bad kiwei kiwei na ki bynta bapher bapher jong ka Jylla Assam kaba pynpaw ba ka jingkhaïi ïa ki jingdih be-aiñ ka jur bha ha kane ka jylla.
