Shillong, Risaw, 28: Ka Sorkar India lyngba ka Food Corporation of India (FCI) ka la pyllait paidbah ïa u kew lyngba ka Open Market Sale Scheme OMSS(D) manla ka taïew na ka bynta ban pynneh ïa ka dor jong u kew ha ka ïew.
U kyrwoh ba la phah da u General Manager (R) FCI-RO NEF u la pyntip ba ka jingdie lilam ïa u kew manla ka taïew ka la kiew na ka 2 lak metric ton sha ka 3 Lak metric ton ha ka shitaïew.
U la pyntip ruh ba ka dor jong u kew (URS Wheat) ka long T. 2125 shi kwintal bad na ka bynta u kew (FAQ Wheat) ka dor ka long T. 2150 shi kwintal. Shuh shuh la pynshlur ïa ki nongthied ba ka jingthied kaba tam la pynkiew na ka 100 metric ton sha ka 200 metric ton na ka bynta uwei u nongthied bad ka song kaba duna tam kan long 10 metric ton.
Ka FCI, RO NEF Region kaba peit na ka bynta ka jylla Meghalaya, Mizoram bad Tripura ka la sdang ban die ïa u kew sha ki nongthied ba la rejistar naduh ka 28 tarik, Jylliew, 2023. Ïa ka Notice Inviting Tender (NIT) yn sa thep manla ka sngi thohdieng ha ka MJUNCTION Portal ban pynbud pat sa ka jingdie lilam ha manla ka sngi Balang.
Haduh 18600 Metric ton u kew la tyrwa bad 8600 metric ton la die ha ki Depot bapher bapher hapoh ka thaiñ Shatei Lammihngi. Na ka bynta ka E-auction ka ban sa long ha ka 1 tarik, Naiwieng, 2023, yn tyrwa haduh 1200 Metric ton u kew, kata, 150 %.
Ban pynmyntoi ïa ki nongbam bad ïa ki paidbah, ka FCI ka khmihlynti ba kan don ka jingïashim bynta kaba bun na ki nongthied ba la ïoh jingithuh ha ka jingdie lilam ka ban sa long.
Shuh shuh, ïa u kew ba la thied da ki Processors/Atta chalki/Flour millers/Manufacturers (ym da ki nongkhaïi) na ka FCI hapoh ka OMSS (D) kin hap ban tylliat hi ïa u kew bad ban pyllait ban die ha ïew hapoh lai phew sngi naduh ka sngi ba la kit ïa u kew.
