Shillong, Naiwieng 04: Ka Ophis jong u Controller of Communication Accounts (CCA), North East India Circle, Tnad Telecommunications, kan pynlong ïa ka Digital Life Certificate (DLC) Camp ha Ophis jong ka BSNL, Tura ha ka 6 tarik Naiwieng.
Ka dei shi bynta jong ka DLC Campaign 4.0 ha ka ri baroh kawei. Kane ka camp kan ïarap ïa ki nongïoh bai bam tymmen ban pynbiang ïa ki Digital Life Certificate jong ki lyngba ka teknoloji pynthikna da ka durkhmat ba buh nongrim ha u Aadhaar ban pyntikna ba ki pynbiang 100 percent.
Hapoh kane ka sienjam, kin pynlong san tylli ki camp ai jingtip jong ki nongïoh bai bam tymmen ha san tylli ki nongbah jong ka thaiñ shatei lammihngi ban pynbiang ïa ki jingshakri kiba kham suk bad kiba lah ban ïoh na ka bynta baroh ki nongïoh bai bam tymmen kiba dei hok.
Ka thong ka long kumba 1000 ngut ki nongïoh bai bam tymmen kiba ki Digital Life Certificate jong ki kin kut noh ha u bnai Naiwieng 2025 bad la pynlong hapoh ka DLC Campaign 4.0 ha ka ri baroh kawei ba la pynlong da ka Tnad Pension & Pensioners’ Welfare (DoPPW), Tnad Personnel, Public Grievances & Pensions. Ha kaba ïadei bad ka Digital India bad Ease of Living missions, ka tnad ka dang pyntreikam ruh ïa kiwei pat ki lad jingïarap kum ki health camp bad ki campaign ai jinghikai ha kaba ïadei bad ka jingshngaiñ ha ka kam cyber ban kyrshan ïa ka bha ka miat bad ka jingpynkupbor ha kaba ïadei bad ki lad digital na ka bynta ki nongïoh bai bam tymmen. Na ka bynta kata ki ïoh ïa ka jingïarap ha ka por kaba biang na ka bynta ka jingpynbiang ïa ka DLC bad ban ïoh ïa ki jingshakri kiba donkam hapoh kawei ka rynsan.
