Shillong, Iaiong 18 : U President ka UDP u bah Metbah Lyngdoh u pynpaw ka jingkyrmen ba ki paidbah jongka Sohiong Constituency kin pynjop donburom ïa u kyrtong ka Party u bah Synshar Kupar Roy Lyngdoh ha kane ka election ka ban long ha ka 10 tarik Jymmang.
“ Ngi sngew thikna ban jop ïa ka Sohiong bad kane ka long kat kum ka jingïoh lum jingtip na ki paidbah kiba trei ha madan namar ki paidbah ki kwah ba ha kane ka kynti ka UDP ka dei ban ïoh beit ïa ka Sohiong Constituency” ong u bah Metbah.
U la ïathuh wat ki briew kiba ju pyrshah bha ïa ka UDP ha ki election kiba la leit noh mynta ki la rai ban ai ka jingkyrshan ba pura ïa u kyrtong ka Party.
U bah Metbah u la ong ba ki paidbah ka Sohiong ki kwah ban siew kylliang ïa ki jingshakri hok u MLA ba rim jong ki uba la khlad noh na kane ka pyrthei u bah HDR Lyngdoh da kaba pynjop don burom noh ïa u pyrsa jong u u bah Synshar Kupar Roy Lyngdoh.
“U bah HDR Lyngdoh u dei uba MLA uba trei shitom na ka bynta ki paidbah bad ka jingthrang jongu ka long barobor ban pynurlong ïa ka jingthrang ki paidbah bad kumta ngi long kiba donbok ban ïoh pynïakhun da u pyrsa jongu hi u bah Synshar kum u kyrtong jongka party namar une ruh u long u samla rangbah uba la tbit bha ban shakri ïa ki paidbah” ong u bah Metbah.
U la ong ka jingjop ia ka Sohiong kan kyntiew ruh ïa ka jingbun paid ka UDP sha ka 12 ngut hapoh ka ïing dorbar.
