Ym pat lah ban pyndonkam thikna ïa ka NESAC ban myntoi ka Thaiñ Shatei Lam

0

Shillong, Iaiong 18 : U Myntri Rangbah ka Jylla Conrad K Sangma mynta ka sngi ula ong ba kan biang palat lada ïoh ïa ka Centre jong ka Indian Space Research Organisation (ISRO) ha Meghalaya.
“Hynrei, ngi la don ïa ka North Eastern Space Application Centre (NESAC) bad kane ka dei kaba heh bha. Namar kata, ka jingkylli ban dawa eiei ka dei ka bym kut satia, namar kata ngi lah ban dawa ïa shibun kiei kiei hangne hynrei kaei kaba kongsan ka long la ngi lah ne em ban pyndonkam ïa kane ka Shnat Treikam na ka bynta ka jingmyntoi jong ka thaiñ bad ka Jylla bad ki nongshongshnong” ong u Conrad haba ïakren bad ki nongthoh khubor.
“Bad ïa mynta hi, ngi sngew ba ka jingdon ka NESAC ruh ngi khlem lah ban pyndonkam thikna kumba dei ban leh” ula bynrap.
U Myntri Rangbah ula ong ruh “Lashai lada phi mut kylli ia nga ba ngi kwah ISRO Centre hangne, hooid ngi kwah hynrei nga kwah ruh ba kan don ka jaka sah jahthait jong ka/u President ka Ri hangne, nga kwah ban ïoh bun ki kad liengsuiñ, nga kwah bun ki medical college—ki jingkwah hi kim kut shuh”.
“Ngi hap ban peit ïa kaei kaba lah ban pynurlong bad kumno ba ngim jam shakhmat, kaei ka ban pynmyntoi ïa ka thaiñ bad ïaid ha ka lynti kaba dei. Ngi hap ban khmih ïa kine kiei kiei baroh. Ka dei ka jingai jingmut kaba biang eh bad ngin hap ban shong bishar ïa ka” ula ong.

Leave A Reply

Your email address will not be published.