Yn pyndam noh ka sorkar ïa ka MOU ba rim ban ïasoi noh da kaba thymmai halor ka Kynshi Power Project

0

Shillong, Nailar 10 : U Myntri ka Tnad Bording u AT Mondal ula pyntip ba ka Tnad bording ka lah ban pyndam noh ïa ka MoU ba la ïasoi ban pyntreikam ïa ka Hyndel project Kynshi Stage-II ba lah bah pynmih ïa ka bording ba 325 megawatt khnang ban ïasoi noh da kaba thymmai.
Haba ïakrren bad ki nongthoh khubor hynne ka sngi Palei, u Mondal ula ong “Ka kompani kam kwah shuh ban nang pyntyllun shakhmat ïa ka project”.
Ula pyntip ba ïa kane ka project yn sa pynkut noh shen. “Kane ka long namar ba ka kompani pynmih bording ba shimet ka la wanrah ïa ka model ba thymmai, kaba ki ong ka kham biang. Ki kwah ban pynkylla noh ïa ka project kaba rim”.
“Hynrei ka kam ka long ba kane ka project ka dei kaba thymmai bad da ki buit bad ki kor technology ba thymmai phin ym lah ban shu pynkylla ïa kawei pa kawei ka lain. Namar kata, kaei kaba ngi ong ha ki ka long ba ngin pyndam noh ïa ka MoU barim bad ngin sa thaw ïa ka MoU ba thymmai bad ngin sa ïasoi ruh ïa ka” bynrap u Mondal.
Ka Jaypee Meghalaya Pvt Limited, New Delhi ka la pynpaw ïa ka jingbym lah ban pynbteng ïa kane ka project namar ka jingdon jong u mar Uranium ha ka thaiñ.
Ha kajuh ka por, u Myntri ula pynpaw ïa ka jingsngewsih ba kam shym la don kawei ruh ka project ba pyntrei da ki kompani shimet hapoh ka Jylla.
“Ngi la iasoi shibun ki memorandum hynrei nga sngewsih ban ong mynta ba ym pat don kawei ruh ka memorandum kaba ka project ka la ïaid ha ka jingpyntrei da ki kompani shimet” ula ong.
Kat kum ka jingong jong u, namar kane, katto katne ki MoU ki la kut por noh bad ka Sorkar ka hap ban pynduh pyndam noh ïa ki.

Leave A Reply

Your email address will not be published.