Haduh 8.62 lak tylli ki EF jong ka SIR ladep ban sam, dang sah sa kumba 14.8 lak ngut

Shillong, Naitung 06 : Ka jingsam ïa ki Enumeration Forms (EFs) hapoh ka Special Intensive Revision (SIR)-2026 ha kylleng ki distrik jong ka jylla mynta ka la kot sha ka 8.62 lak ngut tang haduh mynta ka sngi Nyngkong, ong ka kyrwoh ba la pyllait na ka ophis treikam jong u Chief Electoral Officer ka Jylla ha kane ka sngi Nyngkong.
Katkum ka kyrwoh la ïathuh ba haduh mynta ka sngi Nyngkong la dep ban sam haduh 8,62,594 tylli ki Form na ki 23,49,645 ngut ki nongthep vote kiba don ha ka jylla. Kumta lada khein kyllum, kumba 36.71 persen ka jingsam ïa ki Enumeration Forms ka la dep ha ka jylla.
La ïathuh ba ïa kane ka kam la pyntyllun da ki 3,551 ngut ki Booth Level Officers (BLOs) ha kylleng ka jylla, bad uwei pa uwei u BLO u la sam kumba 243 tylli ki form haduh mynta.
Katkum ka kyrwoh la ïathuh ba ka South West Garo Hills ka don hakhmat eh ha kaba ïoh ban sam bun tam ki Form namar haduh mynta ka la dep ban sam haduh 86,615 tylli ki form na ki 1,08,883 ngut ki nongthep vote, kaba kot 79.55 persen.
Ka North Garo Hills ka wan ba-ar da ka 55.98 persen hadien ba la sam 80,468 tylli ki form, katba ka East Garo Hills ka wan balai da ka 42.34 persen hadien ba la sam 48,593 tylli ki form.
Ha ka jingkheiñ kyllum pat, ka West Garo Hills ka don bun tam ki form ba la sam, kata 1,51,117 tylli, kaba kot sha ka 38.07 persen jong ki nongthep vote jong ka distrik.
Ka East Khasi Hills, kaba don bun tam ki nongthep vote ha jylla, kata haduh 6,32,146 ngut, ka la sam 2,07,420 tylli ki form, kaba kot sha ka 32.81 persen.
Ha kawei pat ka liang, ka East Jaintia Hills ka wan kham hadien da ki 18.69 persen hadien ba ka la dep ban sam 19,517 tylli ki form. Ka South West Khasi Hills ka la kot 20.75 persen da kaba sam 16,722 tylli ki form, katba ka West Jaintia Hills ka la kot 23.94 persen hadien ba la sam 52,787 tylli ki form.
Katkum ka kaiphod, haduh mynta dang don 63.29 persen ki nongthep vote kiba ym pat ïoh pdiang ïa ki form. Ka ophis u CEO ka la ong ba ka jingleit sam haman la ki iing kan dang bteng ha kine ki taïew ban wan.
La kyntu ruh ba ki nongthep vote ki lah ban wad jingïarap lyngba u 1950 toll-free helpline lane da kaba download ïa ki ECINET bad Voter Helpline apps.