Yn nym weng ka BJP na ka MDA

0

Shillong, Risaw 6 : U nongïalam ka BJP uba dei u MLA na ka South Shillong Constituency bad u Myntri ha kane ka sorkar MDA u bah Sanbor Shullai ula pynsawa da ka sur kaba tyngeh bad shai kdar ba ka BJP kan ym weng satia na ka sorkar MDA wat la ki don katto katne ki nongïalam kiba la kob baroh shi katta ban weng noh na kane ka sorkar.
Kane ka jingkren u bah Sanbor ka long thik hadien shibnai ba la dap ka jingbyrngem jong u Secretary ka BJP ba dei peit ïa ka Meghalaya u M Chuba Ao ban weng noh na ka sorkar MDA ba la ïalam da ka NPP namar u la kynnoh ba ka jur palat ka jingbamsap.
“ Ka BJP kan ym weng na ka sroakr bad kan ïatrei lang haduh ba kut ka samoi” ong u bah Sanbor haba ïakren bad ka tnad pathai khubor PTI.
ïa u bah Sanbor la kyrshan sa da u President ka BJP ha kane ka jylla u bah Ernest Mawrie uba la ong ba ka jingkren jongu Ao ka long ka jingkren shimet jongu khlem da ïamir jingmut bad ki nongïalam ka party ha kane ka jylla. U bah Sanbor u la ong shuh shuh ba lada weng na ka sorkar ha kum kane ka por khamtam shwa ban leit sha ka election kan wanrah pynban ka jingsngewthuh bakla ha ki nongkyrshan ka BJP.
“U Ao u khlem ïamir jingmut bad ki nongïalam ka BJP ha kane ka jylla bad halor kane nga la pyntip ruh sha ki nongïalam ka BJP sha Delhi” ong u bah Mawrie,
Ka BJP kaba don arngut ki MLA ka dei kaba ïatrei lang naduh ba sdang bad ka sorkar MDA hapoh ka jingïalam ka NPP. Ka MDA ka don 48 ngut ki MLA bad 23 ngut ki dei na ka NPP.
Halor ki jingkynnoh bamsap ïa kane ka sorkar MDA u Ao u la ïathuh ha u bnai ba la dep ba ka BJP ka dang bishar bniah ïa kine ki jingkynnoh bad ka la bthah ruh ïa ki dkhot jongka ban wad ïaki sabut sakhi kiba biang bad lada don ki sabut kiba biang lah ban aiti sha ki tnad tohkit jongka sorkar pdeng ruh khamtam ha kaba ïadei bad ki skhim na ka sorkar pdeng.

Leave A Reply

Your email address will not be published.