Da ka Black Day khot ka ICYM ba thombor ki RSS

Shillong, Risaw 6 : Ka Indian Catholic Youth Movement (ICYM) ka pynrem jur ïa ka jingthom bor ki RSS, Bajrang Dal bad VHP ïa ki samla kiba leit sha ka Convention kaba la pynlong ha Khandwa, Madhya Pradesh ha ka 3 tarik Risaw 2022.
Ka ICYM ka ïathuh ba kane ka Youth Convention ka dei ban long ha Khandwa naduh ka 2 haduh ka 5 tarik Risaw 2022 bad ki samla na kylleng ki Parish ki la poi sha katei ka jaka. Kine ki samla ki la wan da ka jingai bor hi ki kmie ki kpa bad ki Parish Preist.
Hynrei ha ka 3 tarik ki dkhot ka RSS, Bajrang Dal bad VHP ki la bat ïaki ar tylli ki bus bad kynnoh har rukom ïaki samla da kaba kynnoh ruh ba ki pynkylla Khristan jubor ïa ki samla. Hadien kane la wan ki pulit bad ki la rah beit ïa kitei ki bus bad kitei ki samla sha Police Station khlem da tohkit bniah na ki. Ki la bthah ruh ïa ka jylla niam ha katei ka jaka ba kin pynsangeh noh ïa katei ka Youth Convention ïa kaba la hap ban pynsangeh noh mardor.
Halor kane ka ICYM ka khot bad ïawer ïa baroh ki paid Khristan ba kin ïashim bynta ha ka Black Day ha ka 7 tarik Risaw 2022 ( Lashai ka sngi) da kaba phong da ki jaiñ ïong ne deng lama ïong ha baroh kawei ka ri ban pynpaw ka jingpyrshah ïa katei ka jingthom bor ki RSS, Bajrang Dal bad VHP .
Lah ban kdew hangne ba kane ka jingleh bor bad jingpynwit ki shit niam Hindu pyrshah ïa ki Khristan ha ri India kam dei ka sien kaba nyngkong, hynrei kadei kaba la ju jia na ka por sha ka por bad kane ka wanrah ka jingsngew syier ha ki rit paid jong kiwei pat ki jait niam kiba don ha ri India.