16 ngut kiba ïap, dang jah rngai ka kynhun u nongkiew lum na Shillong ha lum thah Uttarakhand

Shillong, Risaw, 06: Ka Kynhun kiew lum jong u Bah Tiklu Jyrwa, u nongkiew lum na Upper Lumparing, Shillong, kiba la ïashim bynta ha ka jingleit kiew ïa u lum thah Draupadi Ka Danda II, Uttarakhand bad kiba la jah rngai ha ka jingtwa jong u lum thah ym pat lap dien satia haduh mynta.
Katkum ka jingai jingtip jong ka Nehru Institute of Mountaineering Uttarkashi, Uttarakhand ki la pyntip ba ha ka sngi Palei ka kynhun ki nongai jingïarap ba kynthup ïa na ka NIM, shipai India, Indo-Tibetan Border Police (ITBP), ka High Altitude Warfare School (HAWS), shipai suiñ, State Disaster Response Force (SRDF) bad ki bor synshar District ki la ïoh sei 12 ngut ki metïap na u lum thah.
Ha ka sngi Balang, saw ngut kiba la ïap ki kynthup ïa arngut ki Instuctor bad arngut ki nongshah hikai.
Napdeng ki 16 ngut kiba la ïap ki dei ki 14 ngut ki nongshah hikai pyntbit ha ka jingkiew lum.
U kyrwoh u la pyntip shuh shuh ba ka
jingwad ïa kiba dang sahkut ha u lum thah ka dang ïai bteng haduh mynta hynrei ïa ka jingleit wad da ka Helicopter la hap ban pynsangeh noh shipor na ka daw ka jingthud ka suiñ bneng.
Ka NIM, ka la pyntip ba ïa ki met ïap ba la ïoh sei na u lum thah yn sa pynkit noh da ka Helicopter lashai ka sngi Thohdieng kata ruh lada ka suiñ bneng ka ailad.
U Bah Wallambok Lyngdoh Marshyllong ha ka jingïakren bad u Mawphor u la pyntip ba ki bahaing hasem kim pat ïoh khubor satia halor ka jinglong jingman jong ka kynhun kiew lum jong u Bah Tiklu kiba la ngat ha kane ka jingjia.
“Ngi dang ap ïa ka khubor bad ngim pat ïoh ktien eiei,” la ong u Bah Wallambok uba dei u Kynum jong u Bah Tiklu.
“Katkum ka jingïoh jingtip, la ïathuh ïa ngi ba ka kynhun jong u Bah Tiklu ka dei kaba ïaid na kawei ka liang ba la twa u lum thah bad ka don ka lad ba kane ka kynhun ka dang lah ban lait im,” u la ong.
Kum ban shu pynkynmaw hangne ba u Bah Tiklu uba dei u dkhot jong ka Meghalaya Sports Climbing and Mountaineering Association (MeSCMA) u la leit ban ïashim bynta ha kane ka jingkiew ïa u lum thah ha ka jylla Uttarakhand da ka jingbei jingïarap jong ka Directorate of Sports and Youth Affairs ka Sorkar Jylla lyngba ka MeSCMA ban ïashim bynta ha ka Advance Mountaineering Course.