Hato ka Congress kan dang lah ban bat biang ïa ka Shillong Seat ha ka Election MP ka ban sa long ha u snem ban sa wan? Kane ka dei ka jingkylli kaba ki paidbah ki la sdang ban ïakren sharum bad shaneng namarba ka jingpynkhreh ïa kane ka elekshon ka la nang ïaid shaid shaid. Watla ki 12 ngut ki MLA ka Congress hapoh ka jingïalam jong u Mukul Sangma ki la phet noh na ka Congress bad ki la pynïasoh bad ka Trinamool Congress ha shwa ka elekshon MLA 2023 hynrei ka Congress ka dang sah mynsiem bad ka dang lah ban jop haduh 5 ngut ki MLA. Ha kato ka por, la bun kiba ar tatien ba ka Congress kan dang jop haduh 5 tylli ki Seat hynrei kane ka jingjop ka pynpaw shyna ba ki paidbah ki dang ieid ïa ka Congress bad ïa ki nongmihkhmat ba ki la jied.
Ka jingmih pyrthei jong ka Voice of the People Party ha shwa ka elekshon ka la pynkhta khlieh haduh katta katta ïa ki seng sainpyrthei kiba la rim ki bym poi pyrkhat ba kane ka seng saiñpyrthei kan jop haduh saw ngut ki MLA.
Kat haduh mynta, dei tang ka VPP, ka NPP kiba dang pynbna ïa ki kyrtong, hynrei la sngewthuh ba ka Congress kan dang pynieng biang ïa u Bah Vincent H. Pala kum u kyrtong ha kane ka kynti nalor ba u dang dei ruh u MP ba mynta jong ka Shillong Parliamentary Seat. U Bah Pala u la shah jied nyngkong eh kum u MP ka Shillong Parliamentary Seat naduh u snem 2009 bad u la jop biang ïa ka elekshon Lok Sabha ha u snem 2014 bad ha u snem 2019. Kane kan dei ka sien kaba saw kaba u Bah Pala un aireng ha kane ka Elekshon Lok Sabha ka ban sa long ha u snem 2024.
Ka VPP ka ladep pynbna ïa u Dr. Ricky J. Syngkon kum u kyrtong MP ban pynïakhun na Shillong bad ka NPP ka la sei madan da ka MLA jong ka East Shillong Constituency ka Dr. Ampareen Lyngdoh kaba long ruh ka Myntri Sorkar ban pynïakhun na Shillong katba na Tura ka NPP ka la pynieng biang da ka Agatha K. Sangma kaba long ka MP ba mynta jong ka Tura.
Dei sa tang ka UDP kaba ïatreilang bad ka HSPDP hapoh ka lama jong ka Regional Democratic Alliance (RDA) ka bym ïoh kyrtong ban pynïakhun ha ka elekshon bad ka BJP ruh kumjuh kaba dang ïaksaid ban wad kyrtong na Shillong bad na Tura. Wur wur wer wer, ki khubor hamsaïa ki la her stet bha ha kine ki khyndiat taiew ba u President jong ka Khasi Author Society u Dr. DRL Nonglait bad u President barim jong ka Hynniewtrep Youths Council u Bah Robertjun Kharjahrin ki la pyrshang ban pan tiket na ka UDP. Hynrei ka UDP ka la bynshet ïa kane ka kam ban shim rai da ka State Election Committee jong ka Party.
Watla ka NPP ka kam ba ka khlaiñ bha ha rilum Khasi bad Jaiñtia katkum ka jingïoh vote ha ka elekshon MLA ba ladep long hynrei ha ka elekshon MP u paidbah u tip pat kumno ban rai bad kane kan buh jingeh bha ïa ka NPP kaba kam ba ka khlaiñ.
Kumba ka paw lyngba ki khubor ha ka social Media, ka VPP ka la rung sha manla ki shnong ban pynrung dkhot ïa ki paidbah bad ym tang katta, ki lad pathai khubor ki pynheh iew hana ba ka VPP ka la pynpra ïa ki ktem bakhlaiñ jong kiwei party.
U paidbah u tip bha kumno ban kheiñ jingkheiñ namarba ka party ka ban synshar ha Delhi ka dei beit ka party kaba ïoh ïa jingbun paidbah bad ka Congress ka la synshar 60 snem ïa ka Ri India bad ha kine ki 10 snem ba la leit noh ka BJP ka la ïoh knieh ïa u lakam synshar na ka kti jong ka Congress. Ki party riewlum kin shu long tang ki rong ser hakhmat ki party heh na Rithor. Kam long kaba suk ïa ki party riewlum namar ban jop tang uwei u MP yn ym don ba sngap hi ruh ïa ka sur jong uwei khamtam hapdeng ki spah ngut ki MP na Rithor.
U paidbah u hap ban khan bad puson bha, ïano ban pynphong pansngiat ha ka samoi jied syiem ka ban sa long ha u snem 2024. Lada ka Congress kan ïoh ïa ka jingjop bun paid khlempep kan ïohlad ban thaw ïa ka Sorkar bad mynt ka Congress ka la ïatehlok bad ki 28 tylli ki seng sainpyrthei ha dewbah India da kaba thaw ïa ka kynhun INDIA ban pynliem lyndang ïa ka BJP ha kane ka elekshon.
Ha ka elekshon 2019, ka BJP ka la jop kput haduh 301 Seat, katba ka Congress ka la jop tang 50 seat.
