Yn leit mihkhmat 2 ngut ki thei bhabriew ïa ka jylla ha ki jingïakob thei bhabriew ha ri India

Shillong, Jymmang 16: Ka LD Ventures kaba pynïaid ïa ka Miss Universe Meghalaya 2026 bad ïa ka Miss Teen Meghalaya 2026 ki la pynithuh ïa ki nongjop ha kane ka jingïakob thei bhabriew na ka bynta kitei ki artylli ki jingïakob bad kine ki nongjop kin mihkhmat ïa ka jylla Meghalaya ha ka jingïakob thei bhabriew ha Ri India.
U Bah Brian Wahlang u ba dei u State Peagent Coordinator haba kren ha ki lad pathai khubor ha Shillong Press Club u la ïathuh ba ka samla Sanwaka Surong kaba jop ïa ka Miss Meghalaya 2026 kan mihkhmat ïa ka jylla Meghalaya ha ka jingïakob Miss Universe India 2026 bad ka Miss Teen Meghalaya 2026 ka samla Odarica Kamar War kan mihkhmat ïa ka jylla Meghalaya sha ka Miss Teen India 2026.
U Bah Brian u la ïathuh ba kine kin sa leit shah hikai pyntbit shuh shuh shabar ka jylla ha ki nonghikai kiba kham tbit namar kane ka jingïakob thei bhabriew ha ka Ri India kan sa long hapdeng u bnai Jylliew, Naitung, bad Nailar.
Halor kane na ka liang jong ki nongpynïaid na kane ka jylla ki don ka jingkyrmen skhem ba kin poi sha ka thong wat la ka jingïakob kan long kaba jwat.
Shuh shuh u Bah Brian Wahlang u la ai ka jingkhublei ruh ïa ka Dr. Tanawi Marak kaba la rah ïa ka jylla Meghlaya sha ki rynsan kiba kham shalor, la ïathuh ba ki la ju phah ïa ki thei samla kiba tbit sha kine ki rynsan jingïakob thei bha briew bad ha kane ka kynti kaba mynta ka Tanawi ka la ïoh ïa ka kyrdan ha kaba ka la wan ba ar ha kane ka jingïakob bad kane baroh ka dei namar ka jingtrei shitom jong ka bad ka la wanrah nam ruh ïa ka jylla baroh kawei.
Ha kane ka sngi na ka liang jong ki nongjop ka Miss Meghalaya bad ka Miss Teen Meghalaya ki la pynpaw ïa ka jingsngewkmen jong ki ba kin ïoh ïa kane ka lad ban mihkhmat ïa ka jylla bad kila pynsngew ba kin trei shitom ban wanrah ïa ka jingjop bad ka burom ka nam ïa ka jylla Meghalaya hi baroh kawei.