Yn khot ïakren biang ka Sorkar India ïa ka ULFA hadien ka 15tarik, ong u Anup Chetia

Shillong, Nailar 09 : U General Secretary jong ka kynhun kieng atiar ba kwah wan sha ka miej ïa kren ïa suk, ka United Liberation Front of Asom (ULFA) u Anup Chetia ha ka sngi Balang u la ïathuh ba ka jingïakren ïasuk hapdeng ka ULFA bad ki nongmihkhmat ka Sorkar India bad Sorkar Assam kan sa long biang ha New Delhi hadien ka 15 tarik Nailar mynta u snem.
“Ha ka jingïakynduh kaba la dep, ngi la kynduh ïa ka kynhun na ka sorkar India bad sorkar Assam. Kumta hadien ka rakhe Sngi Laitluid ka Ri ngi kyrmen ba ka jingïakren jongngi kan long biang ha New Delhi ryngkat bad ki nongmihkhmat na ka sorkar India bad sorkar Assam,” la bynrap shuh shuh u Chetia haba kren bad ki lad pathai khubor hadien ba la wai ka jingïalang jong ka North East Indigenous Peoples’ Forum (NEIPF) ha North Eastern Hill University (NEHU) hynne ka sngi.
Lah ruh ban kdew hangne ba utei u heh ka ULFA ba dei ruh u convener jong ka NEIPF u la don ha Shillong ban shim bynta ha ka International Day of the World Indigenous Peoples ba la pynlong NEIPF.
Shuh shuh da kaba pynpaw ïa ka jingkyrmen ba ka jingïakren ïasuk kan sa kut noh shuwa u 2024, u Chetia ula ong “Shuwa ka elekshon ngi kyrmen ba ngin lah pynbeit noh bad ka Sorkar India”. U ïathuh ba ka Sorkar India ka kwah ban don ka jingïateh kular bad ka kynhun ba kyrshan ïa ka jingïakren ïasuk jong ka ULFA.
“Ka Sorkar India ka sngewthuh ruh ba lada ka ïasoi ïa ka soskular bad ngi, kane kan pynkut noh ïa ki jingeh jong ka Assam” ula bynrap.
Halor ka jingkylli la la don neem pat ka jing ïa u Nongïalam ka ULFA-I Paresh Baruah ban wan lang noh sha ka jingïakren ïasuk, u Chetia ula ong baki la kren bad u hynrei katei pat ka shong ha ka sorkar India bad lada ka kwah ban kren bad u bad ka kynhun. “Hynrei kam shym la don ka jingaiktien bad ka Sorkar India bad ka jingdawa jong ki ruh ka dang dei hi ka juh kumba long mynshuwa bad ka Sorkar India kam lah satia ban pdiang ïa ka jingdawa jong ki,” u la bynrap biang.
Na ka liang u Chetia u la ong ruh ba lada kawei ka kynhun ka wan lang sha ka miej ïakren ïasuk, kan long kaba bha eh ïa ki paidbah bad ïa ka Jylla Assam.