Ujor ka SCDC sha ka KHADC ba thung Lyngdoh ka Hima Mylliem ha Raid Bhoilasa

0

Nongpoh, Nailar, 09: Ka Bhoilasa Social & Cultural Development Committee (SCDC) ha ka sngi Balang ka la ujor sha ka Khasi Hills Autonomous District Council (KHADC) da kaba kynnoh ba ka Hima Mylliem ka la pynkheiñ ïa ka riti ki dustur hapoh ka Raid Bhoilasa, Ri Bhoi District, da kaba shu thung jubor ïa u Lyngdoh Raid khlem da ïoh jingmynjur na ka Raid bad na ka Kur Lyngdoh kaba dei ka Kur kaba lah ban jied ïa u Lyngdoh bapura katkum ka jingrai lang jong ka kur Lyngdoh.
Halor kane ka jingleh donbor jong u Syiem ka Hima Mylliem u Pa’iem Ainam M. Syiem, ban thung jubor ïa u Lyngdoh ka Raid Bhoirlasa khlem da ïoh jingmynjur lang na ka Kur Lyngdoh hi baroh kawei bad na ka Dorbar Raid, ka Bhoilasa Social & Cultural Development Committee ka la pynpaw ïa ka jingpyrshah kaba jur bad ka la ujor pyrshah ruh ïa ka Hima Mylliem sha u Deputy Chief Executive Member (Dy. CEM) ka KHADC bad uba peit ïa ka tnad Elaka, u Bah Pynshngaiñ N. Syiem ban leh eiei halor kane ka jingpynkheiñ ïa ka riti ka dustur hapoh ka Raid Bhoilasa.
Katkum ka shithi ba la ujor sha ka KHADC, ka Committee ka la pynpaw halor ka jingthung jubor ïa u Lyngdoh ka Raid Bhoilasa khlem da mynjur lang da ka Kur Lyngdoh bad ruh khlem da ai jingtip sha ka Dorbar Raid bad ha ka jingshisha ban jied ne thung ïa u Lyngdoh dei ban jied da ka Kur Lyngdoh bad ban ai jingmynjur lang da ka Dorbar Raid, hynrei khlem da pynlong ïa ka jingjied (Election) na ka kur Lyngdoh bad la shut hung jubor beit da u Syiem ka Hima Mylliem.
Ka shithi ba la ujor ka la pynpaw ruh ba kane ka jingpyrshah kam dei satia tang ka Dorbar Raid Bhoilasa bad kumjuh ruh kane ka Committee, hynrei wat ka Kur Lyngdoh ruh ka pyrshah namar la jied ïa Lyngdoh na ka kur kaba ym dei hok ban ïoh bat ïa katei ka kyrdan Lyngdoh hapoh ka Raid Bhoilasa.
Ka Committee lyngba ka shithi ujor ka la kyrpad jur ïa u Deputy CEM ban bishar hok ïa kane ka kam bad ruh ban weng noh ïa ka jinglong Lyngdoh ba la thung jubor da ka Hima Mylliem khnang ba kan ym ktah ïa ka synshar ka khadar bad ïa ka riti ka dustur hapoh ka Raid kumba la ïalam da ki longshuwa ki manshuwa ban wan ka shongsuk shongsain bad ka bha ka miat hapoh ka Raid hi baroh kawei.

Leave A Reply

Your email address will not be published.