Ym pat shim rai ka sorkar pdeng halor ki samla pule ba shah ktah na ka jingïaum snam ha Manipur

Shillong, Nailar 09 : U Myntri Rangbah ka Jylla Conrad K Sangma ha ka sngi Balang ula pyntip ba ka Sorkar Pdeng kam pat shim rai halor ki samla pule ka Jylla Meghalaya, kiba la shah ktah na ka jingïaumsnam ha Jylla Manipur.
Haba ïakren bad ki Nongthoh khubor, u Conrad ula ong ba ka kynhun ba u ïalam na Jylla, ka la iakynduh ïa u Myntri ka Koit ka Khiah bad Myntri ka kam rep ka Sorkar Pdeng ha ka jingleit sha New Delhi hynnin ka sngi.
“Ngi la tyrwa sha baroh arngut (Myntri ka Sorkar Pdeng) ba ki samla kiba pule ha RIIMS bad ha ka CAU. Imphal, lada ïa ka shisnem ki lah ban ai jaka hangne ha Shillong la ka long ha RIIMS jong ka Medical lane ha kano kano ka jaka ba marjan ka thaiñ Shatei Lam Mihngi bad ha Barapani Campus jong ka CAU, ha kaba ki samla pule Agriculture ki lah ban leit shah hikai ba shisnem” ula ong.
U Conrad ula ong “Ngi la ïoh ïa ka jubab kaba sngewtynnad na ki Myntri hynrei yn dang shim rai halor kane ka kam. Nga tharai ïa ka rai yn sa shim da u Myntri kam Pohïing bad kiwei ki Myntri Sorkar hynrei kine baroh arngut ki Myntri ki la ai jingkyrmen bad pynpaw ba ka dei ka jingai jingmut kaba biang palat”.
Ha kajuh ka por, u Conrad ula kyntu ïa baroh ba kin ïatreilang bad ban wad ïa ka lynti ba jai jai bad ba neh slem ha kaban pynkut noh ia ki kam ïaumsnam ha Manipur.
Haba pynpaw ba kane kam dei ka por ban kynnoh ïano ïano ruh halor ka jinglong jingman ha Manipur, u Conrad ula ong “Lada phi ïohi, ngim pat ju kynnoh ïano ïano ruh. Ngi shu ong ba ngi donkam ban shim ïa ki sienjam. Ka dei ka kam kaba bun jyrwit jyrwat bha. Phi hap ban sngewthuh. Ka long kaba suk ïa phi ban kynnoh hynrei ka long pat kaba donkam ban sngewthuh ïa kaei kaba don ha lynter bad kumno kine ki jingjia ki jia”.