Shillong, Nailar 04: Ka Sorkar jylla ka la rai ban khot biang ïa ki nongtrei ka SSA kiba dang pynlong ïa ka jingïakhih haduh mynta ban ïakren halor ki jingdawa ban kyntiew ïa ka tulop.
Haba pyntip ïa kane ha ka sngi U Blei, u Commissioner & Secretary, Education u Vijay Kumar Mantri u la ong ba ka jingïalang kaba ar halor ka Rationalisation Committee ba la thaw da ka sorkar jylla ban khmih bniah halor ka jingtyrwa ban kyntiew ïa ka tulop ki nongtrei ka SSA ha ka jylla, ba kynthup ha ki District bad ki Block ka ban long ha ka 8 tarik mynta u bnai.
“Ngi la dep mynjur ha ka part-1 da baroh ki dkhot. Hynrei hadien ki la pynpaw ba kim mynjur naba ki kwah ïa ka jingsiew kaba beit lang ïa baroh ha baroh ki kyrdan,” u la ong.
Haba kylli u Mantri u la ong, “Haoid. Ka jingdawa jong ki kadei 80% ïa baroh. Kito kiba pynïasoh dangshen bad kito kiba la trei la 20 snem mynshwa kin ïoh kajuh ka tulop bad kam shym don ka jingïakren halor ka seniority.”
“Mynta DEO ïoh tulop T. 8000 bad ki Coordinator ki ïoh T. 35000 bad lada pyntreikam ïa ki jingdawa jong ki DEO kin ïoh T. 14400 bad ki Coordinator kin ïoh T. 63000 kaba ym long kaba bha ïa ki DEO,” u la bynrap.
Lah ban ong ba kane ka jingïakhih ba khlem buh por jong ki nongtrei SSA hapoh ka shatri All Meghalaya SSA Non Teaching Staffs Association (AMSSANTSA) ka la kynjoh sha ka sngi kaba san ha ka sngi U Blei.
Ha kane ka sngi kitei kiba la ïakhih ki la pynlong ruh ïa ki jingduwai bad ki jingrwai gospel ha kane ka jaka ïakhih.
