Shillong, Nailar 04: U Additional Director ka kynhun shipai Border Security Force (BSF) Kolkatta u Ravi Gandhi ha ka jingwan jngoh jong u ïa ka jylla Meghalaya saw sngi lynter u la leit sha khappud bad ka Bangladesh ban ïakynduh ïa ki shipai kiba don ha khappud.
Ha kane ka jingwan jngoh ïa ki khappud u la khot ruh ïa ka jingïalang ban ïakren ïa ka jinglong jingman jong ki khappud ha ki thaiñ mihngi ba dei jong ka Eastern Command ban peit ba ki kam ki jam kin long kiba ïaid beit ha kaba ïadei bad ka jingïada ha khappud bad ka Bangladesh.
U ADG u la ban jur ba ka jingpahara ha khappud bad ka Bangladesh ka dei ban long kaba phikir bha wat hapdeng ki jingeh kaba ki ïa kynduh namar ka jylla Meghalaya la tip kum ka jylla kaba jur slap kaba juh long hynñiew bnai lynter man u snem, hynrei hapdeng kine ki jingeh kila trei ban ïada ïa u pud u sam.
Ha ka jingleit ka jong u ADG sha Garo Hills u la leit ruh sha khappud bad ka Bangladesh ha kaba la synranlang ïa u da u Superintendent ki Pulit bad Deputy Commissioner jong ka West Garo Hills District ryngkat bad ki ophisar jong ki BSF bad ka la don ka jingïalang ban ïakren ban don ka jingïajan hapdeng ki pulit bad ki BSF.
Ki BSF kin pyndonkam noh ïa ki kor ki bor ban ban peitngor ïa ka khappud bad ka Bangladesh bad ban pyndonkam ïa ki tiar kiba katkum kane ka juk kaba mynta ban pynkhlaiñ ïa ka jingphara ha khappud ban khanglad ïa ki kam beaiñ bad ka jingwan rung beaiñ.
U ADG u la pynpaw ba ki briew jong ka jylla Meghalaya ki dei kiba pyrshah ïa ka jingwan rung beaiñ ki briew na shilliang khappud namar ki sngewthuh ba kane kan ktah ïa ka ïoh ka kot jong ki paidbah bad ki briew kane ka jylla ki kut jingmut ban ïaleh pyrshah ïa ka jingwan rung beaiñ ki briew na bar ri.
U ADG u la ai ruh ka jingïaroh ïa ki Commander kiba don ha khappud bad kiba la trei shitom ban ïada na ka jingwan rungtuh ki briew na Bangladesh bad ki BSF kila kut jingmut ban ïada ïa u pud u sam jong ka ri ha khappud.
