Yn ïatreilang ka NCPCR bad ki ADC ban ïada ïa ka hok ki khynnah ha Meghalaya: Kanoongo

Shillong, Jylliew 23: Ka National Commission for Protection of Child Rights (NCPCR) ka la rai ban ïatreilang bad ki lai tylli ki Autonomous District Council (ADC) ban ïada ïa ka hok ki khynnah ha Meghalaya.
“Ngin sa ïatreilang bad ki ADC ban pynshai paidbah halor ka POCSO Act bad ban khanglad ïa ka jingarmet khynnah” ong u Chairperson ka NCPCR Priyank Kanoongo haba ïakren bad ki nongthoh khubor ha ka sngi Saitjain.
“Ngin sa pynlong ïa ki jingïalang ban ai jingbatai bad ki workshop nalor ki jingiasyllok bad ki ADC. Ha une u snem mang tyngka ba mynta, ngin sa pynlong ïa ki workshop bad baroh lai tylli ki ADC halor ki kam bad ïadei bad ka hok jong ki Khynnah” ula ong.
U Kanoongo ula ong ba ka Commission kala ïoh ïa ka jingkular na ka Sorkar ba kan sa sdang shen ïa ka kam ban thung ïa ka Chairperson ka State Commission for Protection of Child Rights (SCPCR).
Nalor kane, ka NCPCR kala bthah ruh ïa ka Sorkar Jylla ban pynlong ïa ka survey na ka bynta ki khynnah ba duna dkhot met hapoh ka Jylla.
“Ki don haduh 4000 ngut ki khynnah ba duna dkhot met kat kum ka jingkheiñ ba ai da ka Tnad Education. Ngi la bthah ïa ki ban kheiñ lang ïa ki jingkheiñ, bad leh ïa ka survey ïa ka jingdon ki khynnah ba duna dkhot met ha Jylla” ula ong.
Ha kajuh ka por, u Chairperson ka NCPCR ula bthah ïa ka Tnad Pulit ban peitngor halor palat 731 tylli ki pharmacy hapoh ka Jylla, kiba die ïa u schedule H bad schedule x drugs khlem da ïoh jingthoh na ki doktor.