Shillong, Jylliew 22: U Bah Process T Sawkmie, MLA barim ka Mawlai haba kren sha ki lad pathai khubor u la pynpaw ïa ka jingsngewkhia jur halor ka Reservation Policy bad um kwah ba kane ka ishu ne mat kan pynkylla Manipur ha ka jylla Meghalaya.
U Bah Process u pynpaw ba baroh shi katta ba um kwah ban kren halor kane ka bynta, hynrei mynta ynda la ïohi na ki lad pathai khubor halor ka jingai jingmut jong kiba bun halor kumnno ban jam shakhmat halor ka Reservation Policy, ka la pynlong ïa u ba um banse ban mihlang shakhmat ban kren ïa kane ka mat.
U pynpaw ba ki sengbhalang, ki riew shimet bad bun kiwei ki la ai la ki jong ki jong ki jingai jingmut. Hynrei kane ka jingleh jong ka Expert Committee i pynban kumba kan wanrah ïa ka jingïapait ïapra baroh kawei ka jylla.
Baroh hi kiba ai jingmut ki shimkhia hi la ki jong ki jong ki jaitbynriew, ki Khasi Jaiñtia bad Garo bad ki la don ruh sa kiwei ki jaitbynriew kiba sngew ba ki dei hok ban dawa lang ïa kane ka reservation policy, bynrap u Bah Sawkmie.
U ong ruh, ka Meghalaya ka dei ka jylla kaba shongsuk shongsaiñ, u tieng ïoh lashai la shi sngi ka jingleh jong ka Expert Committee ka lah ban wanrah pynban ïa ka jingïapait ïapra, ka jingïashrut para nong Meghalaya, ïoh mih kano kano ka jingjia, kaba lah ban poi shaduh u pud bym lah shuh ban tehlakam.
U la pynpaw ba la ïohi ïa ka jingjia ha Manipur mynshem snem halor ka jingthmu ai Scheduled Tribe ïa kawei na ka jaitbynriew ha Manipur, kaba la mih pynban ka jingïaumsnam, ka jingthang ïing thang sem, thang ïing mane bad kiwei ki jingjia ba sngewsih.
Kumta shwa ba kine kiei kiei kin jia, ka sorkar lyngba ka jingkhmih jong u Myntri rangbah ka jylla ba kin shimkhia bad phikir bha ïa kane.
U la pynpaw ruh ïa ka jingsngewsih ba hapoh kane ka Expert Committee ym don trai jylla, uba lah ban sngewthuh bha ïa ka jinglong tynrai jong ki Khasi Jaiñtia bad Garo.
Kaba sheptieng ba ïoh kane ka committee ka shim la ka jong ka rai kaba lait shabar bad kaba lah shilliang.
Kumta u kyntu ïa ka sorkar kaba dei ban peit ba kan nym leh shilliang na ka bynta ka jingbit jingbiang jong ka baroh.
Halor ka jingdon kiba ong bym donkam shuh ïa Reservation Policy, u pynpaw ba reservation policy ka long kaba donkam bha, wat ki jylla kiba la kiew kum ka Maharashtra, Andhra Pradesh, Tamilnadu bad kiwei ruh ki dang pynneh ïa ka reservation halor ka bhah kam bhah jam, katno tam lei ka Meghalaya ka donkam ïa kane.
